पुणे विद्यापीठाचा महत्त्वपूर्ण निर्णय; परीक्षा केंद्रांचे लेखापरीक्षण होणार

२०२६-२७ च्या पहिल्या सत्रातील परीक्षांपूर्वी, सुविधा, कर्मचारी आणि परीक्षाविषयक नियमांचे पालन यांची पडताळणी करण्यासाठी SPPU संलग्न महाविद्यालयांमधील परीक्षा केंद्रांचे लेखापरीक्षण (ऑडिट) करेल.

Sep 19, 2026 - 18:32 Updated: Sep 19, 2026 - 18:44

पुणे विद्यापीठाचा महत्त्वपूर्ण निर्णय; परीक्षा केंद्रांचे लेखापरीक्षण होणार

एज्युवार्ता न्यूज नेटवर्क

सावित्रीबाई फुले पुणे विद्यापीठाने संलग्न महाविद्यालयांमधील आगामी परीक्षा अधिक पारदर्शक, शिस्तबद्ध आणि सुव्यवस्थित वातावरणात पार पाडण्यासाठी एक महत्त्वाचा निर्णय घेतला आहे. विद्यापीठाने सर्व परीक्षा केंद्रांचे लेखापरीक्षण करण्याची घोषणा केली असून, यामुळे परीक्षा केंद्रांमधील सुविधा, मनुष्यबळ आणि तयारीची सखोल तपासणी होणार आहे. परीक्षा आणि मूल्यमापन मंडळाचे संचालक डॉ. राजेंद्र तलवारे यांनी याबाबत अधिकृत परिपत्रक जारी केले आहे. शैक्षणिक वर्ष २०२६-२७ च्या प्रथम सत्रातील परीक्षांपूर्वी हे संपूर्ण लेखापरीक्षण पूर्ण करण्यात येईल, जेणेकरून विद्यार्थ्यांना निष्पक्ष आणि व्यवस्थित परीक्षा केंद्र उपलब्ध होतील.

परीक्षा केंद्र म्हणून मान्यता मिळविण्यासाठी संबंधित महाविद्यालयांच्या प्राचार्य आणि संचालकांना विद्यापीठाच्या परीक्षा विभागाच्या ऑनलाइन प्रणालीवर अर्ज सादर करण्याची मुदत देण्यात आली होती. प्राप्त झालेल्या अर्जांची पडताळणी २२ सप्टेंबरपर्यंत करण्यात येणार आहे. यानंतर २६ सप्टेंबर ते ५ ऑक्टोबर दरम्यान विद्यापीठाची विशेष समिती संबंधित केंद्रांची प्रत्यक्ष किंवा ऑनलाइन पाहणी करणार आहे. या पाहणीत परीक्षा केंद्रासाठी निश्चित केलेल्या सर्व निकषांची पूर्तता होत असल्याची खात्री केली जाईल. जे महाविद्यालय हे निकष पूर्ण करतील, त्यांना १२ ऑक्टोबरपासून सुरू होणाऱ्या प्रक्रियेत ऑक्टोबर-नोव्हेंबर परीक्षांसाठी अंतिम मान्यता देण्यात येईल.

लेखापरीक्षणादरम्यान कोणत्याही महाविद्यालयात त्रुटी आढळल्यास त्यांना परीक्षा केंद्र म्हणून मान्यता मिळणार नाही. अशा परिस्थितीत त्या महाविद्यालयातील विद्यार्थ्यांची बैठक व्यवस्था जवळच्या मान्यताप्राप्त परीक्षा केंद्रावर करण्यात येईल. संबंधित महाविद्यालयाने त्या मान्यताप्राप्त केंद्राला आवश्यक मनुष्यबळ आणि इतर संसाधने उपलब्ध करून देणे बंधनकारक राहील. यामुळे विद्यार्थ्यांना कोणत्याही अडचणीचा सामना करावा लागणार नाही आणि परीक्षा प्रक्रिया सुरळीत राहील.

हा नियम पुणे, अहिल्यानगर आणि नाशिक जिल्ह्यांसह दादरा व नगर हवेली येथील सावित्रीबाई फुले पुणे विद्यापीठाशी संलग्न सर्व संस्थांना लागू आहे. लेखापरीक्षणामुळे परीक्षा केंद्रांमधील उपलब्ध सुविधा, मनुष्यबळाची पर्याप्तता आणि परीक्षा संचालनाची तयारी यांची कसून तपासणी होईल. परिणामी परीक्षा अधिक शिस्तबद्ध, पारदर्शक आणि विश्वासार्ह पद्धतीने घेता येतील. विद्यापीठाच्या या निर्णयाने शैक्षणिक गुणवत्ता वाढण्यास आणि विद्यार्थ्यांच्या हिताचे रक्षण होण्यास मदत होईल, अशी अपेक्षा व्यक्त केली जात आहे.