SET विभागाला कोणी नाही वाली; सर्व पदे झाली खाली, यंदा सेट परीक्षा चांगलीच लांबणार? 

एज्युवार्ता न्यूज नेटवर्क 

सहाय्यक प्राध्यापक पदाच्या पात्रतेसाठी सावित्रीबाई फुले पुणे विद्यापीठाच्या (Savitribai Phule Pune University)सेट विभागातर्फे (Set department) सेट परीक्षा घेतली जाते. मात्र, या विभागाला आता कोणीही वाली उरलेला नाही. त्यामुळे परीक्षा कोणी घ्यायच्या आणि प्रशासकीय कारभार कोणी पहायचा हा मोठा प्रश्न निर्माण झाला आहे. काही महिन्यांपूर्वी सेट विभागाच्या प्रमुख पदी नियुक्त झालेल्या डॉ. अविनाश कुंभार यांनी राजीनामा दिल्यामुळे सेट विभागाचे प्रमुख पद पुन्हा रिक्त झाले आहे.

महाराष्ट्र व गोवा राज्यातील उमेदवारांची सेट परीक्षा सावित्रीबाई फुले पुणे विद्यापीठ तर्फे घेतली जाते. सुमारे एक लाखाहून अधिक उमेदवार सेट परीक्षेसाठी अर्ज करतात. गेल्या अनेक वर्षांपासून बाळासाहेब कापडणीस यांनी सेट विभागाच्या प्रमुख पदाची धुरा सांभाळली होती. त्यांनी राजीनामा दिल्यावर विद्यापीठातील माजी प्राध्यापक डॉ. अविनाश कुंभार यांच्याकडे सेट विभागाच्या प्रमुख पदाची जबाबदारी देण्यात आली होती.मात्र, सुमारे महिनाभारापूर्वी कुंभार यांनीही राजीनामा दिला.तसेच सेट विभागाचे प्रशासकीय कामकाज पाहणारे सहाय्यक उपकुलसचिव आणि सुद्धा राजीनामा दिला आणि त्यांनी दुसरी शासकीय नोकरी स्वीकारली. त्यामुळे सेट विभागाचे कामकाज करण्यासाठी सध्या विभागात कोणीही वरिष्ठ अधिकारी उपलब्ध नाही.

सर्वसाधारणपणे वर्षातून दोन वेळा सेट परीक्षा घेतली जाते. पुढील परीक्षा घेण्याच्या नियोजनाची कार्यवाही कुंभार यांनी सुरू केली होती. शासनाकडून मान्यता मिळाल्यानंतर सेट विभागातर्फे प्रश्नपत्रिका संच तयार करून परीक्षेचे नियोजन करणे अपेक्षित होते. परंतु, सेट विभागाला सध्या अधिकारीच उरले नाहीत. एकूणच विद्यापीठाला पूर्णवेळ कुलसचिव नाही, पूर्णवेळ अधिष्ठाता नाहीत, त्यात आता सेट विभागासारख्या महत्त्वाच्या विभागात सुद्धा कर्मचारी उरले नाहीत. त्यामुळे सेट परीक्षा लांबण्याची शक्यता व्यक्त केली जात आहे.