धक्कादायक: दहावीचा गणिताचा पेपर फुटला; बोर्डाकडून टेलिग्राम ग्रुपविरोधात पोलिसाकडे तक्रार

एज्युवार्ता न्यूज नेटवर्क 

महाराष्ट्र राज्य माध्यमिक व उच्च माध्यमिक शिक्षण मंडळातर्फे घेतल्या जात असलेल्या इयत्ता दहावीच्या परीक्षेत दरम्यान गणित विषयाची प्रश्नपत्रिका फुटल्याची धक्कादायक माहिती समोर आली आहे. एका टेलिग्राम ग्रुपवर गणित एक आणि गणित दोन या दोन्ही विषयांचे पेपर टाकण्यात आले होते. या प्रकरणी पुणे विभागीय शिक्षण मंडळाने शिवाजीनगर पोलीस ठाण्यात संबंधित ग्रुप ॲडमिन आणि सदस्यांविरोधात गुन्हा दाखल केला आहे. दरम्यान, राज्य मंडळातर्फे लवकरच याबाबत प्रसिद्धी पत्रक काढले जाणार आहे. 

गणित विषयाचा पेपर टेलिग्राम ग्रुपवर प्रसिद्ध झाल्यामुळे विद्यार्थ्यांना या विषयाची परीक्षा पुन्हा द्यावी लागणार का? असा प्रश्न आता उपस्थित होत आहे. परीक्षेबाबत अत्यंत गोपनीयता पाळली जात असताना सुद्धा प्रश्नपत्रिका थेट सोशल मीडियावर कशा उपलब्ध होतात ? हा प्रश्न राज्य मंडळालाही पडला आहे. परंतु, वर्षभर अभ्यास करून परीक्षेची प्रामाणिकपणे तयारी करणाऱ्या विद्यार्थ्यांकडून या घटनेबाबत तीव्र नाराजी व्यक्त केली जात आहे.

पुणे विभागीय मंडळाचे सहाय्यक अधीक्षक चंद्रकांत जेवळीकर यांनी यासंदर्भात पोलिसांकडे तक्रार दिली आहे. मंडळाच्या अधिकाऱ्यांना एका टेलिग्राम ग्रुपची लिंक संशयास्पद असल्याचे आढळून आले. त्यानंतर वरिष्ठ अधिकाऱ्यांनी संबंधित ग्रुपची तपासणी केली असता धक्कादायक बाब समोर आली. दिनांक 6 मार्च रोजी झालेल्या गणित भाग एक च्या प्रश्नपत्रिकेचा फोटो 5  मार्च रोजी रात्री 8  वाजून 37 मिनिटांनी ग्रुपवर टाकण्यात आल्याचे आढळून आले. त्याचप्रमाणे 9 मार्च रोजी झालेल्या गणित भाग 2 या विषयाच्या प्रश्नपत्रिकेचा फोटो 6 मार्च रोजी सायंकाळी 4 वाजून 56 मिनिटांनी ग्रुप वर प्रसिद्ध करण्यात आला. राज्य मंडळातर्फे उपलब्ध करून देण्यात आलेल्या प्रश्नपत्रिका आणि सोशल मीडियावर टेलिग्राम ग्रुप वर उपलब्ध करून देण्यात आलेल्या प्रश्नपत्रिका या दोन्ही एकसारख्या असल्याचे निदर्शनास आले.त्यामुळे एकाच खळबळ उडाली आहे.