मुंबई विद्यापीठ: ११ हजार विद्यार्थ्यांचे एबीसी-अपार आयडी लिंकिंग अपूर्ण; वेळेत पूर्ण न केल्यास परीक्षेला मुकावे लागणार
राष्ट्रीय शैक्षणिक धोरण २०२० नुसार मुंबई विद्यापीठाअंतर्गत परीक्षा देणाऱ्या सर्व विद्यार्थ्यांसाठी वैध एबीसी आयडी किंवा अपार आयडी अनिवार्य करण्यात आला आहे. परीक्षा अर्ज भरताना हा आयडी नमूद करणे आणि विद्यापीठाच्या पोर्टलशी जोडणे आवश्यक आहे.
Eduvarta
एज्युवार्ता न्यूज नेटवर्क
राष्ट्रीय शैक्षणिक धोरण २०२० नुसार मुंबई विद्यापीठाअंतर्गत परीक्षा देणाऱ्या सर्व विद्यार्थ्यांसाठी वैध एबीसी आयडी किंवा अपार आयडी अनिवार्य करण्यात आला आहे. परीक्षा अर्ज भरताना हा आयडी नमूद करणे आणि विद्यापीठाच्या पोर्टलशी जोडणे आवश्यक आहे. शैक्षणिक क्रेडिट्सचे डिजिटल स्वरूपात संकलन, संचयन, हस्तांतरण आणि पडताळणी सुलभ व्हावी, या उद्देशाने हे पाऊल उचलण्यात आले आहे. मात्र अद्यापही विद्यापीठातील हजारो विद्यार्थ्यांनी ही महत्त्वाची प्रक्रिया पूर्ण केलेली नाही.
मुंबई विद्यापीठात शिक्षण घेत असलेल्या विद्यार्थ्यांपैकी ११ हजारांहून अधिक विद्यार्थ्यांनी आपला एबीसी आयडी किंवा अपार आयडी विद्यापीठाच्या अधिकृत पोर्टलशी जोडलेला नाही. विविध परिपत्रकांद्वारे वारंवार आवाहन करूनही आणि विशेष शिबिरांचे आयोजन करूनही ही संख्या कमी झालेली नाही. परिणामी संबंधित विद्यार्थ्यांचे परीक्षा प्रवेशपत्र जारी केले जाणार नाही, अशी स्पष्ट भूमिका विद्यापीठाने घेतली आहे.
ज्या विद्यार्थ्यांकडे वैध आयडी उपलब्ध नाही किंवा तो पोर्टलशी लिंक झालेला नाही, त्यांना परीक्षेला बसता येणार नाही. यामुळे विद्यार्थ्यांना परीक्षेपासून वंचित राहावे लागू शकते. परीक्षा सुरळीत पार पडावी आणि कोणतीही अडचण उद्भवू नये, यासाठी अंतिम मुदतीची वाट न पाहता तातडीने आयडी लिंक करण्याचे आवाहन संचालक परीक्षा व मूल्यमापन मंडळ डॉ. पूजा रौंदळे यांनी केले आहे.
विद्यापीठाने अशा ११ हजारांहून अधिक विद्यार्थ्यांची यादी तयार करून ती संबंधित महाविद्यालये आणि संस्थांना पाठवली आहे. महाविद्यालयांना या विद्यार्थ्यांचे आयडी तातडीने जोडून घेण्याच्या सूचना देण्यात आल्या आहेत. सर्व संलग्न व संचालित महाविद्यालये, संस्था, शैक्षणिक विभाग आणि केंद्रांच्या प्राचार्य, संचालक व विभागप्रमुखांनी परीक्षा अर्ज भरण्यापूर्वी प्रत्येक विद्यार्थ्याचा आयडी पोर्टलशी जोडला गेला आहे याची खात्री करणे आवश्यक आहे.
राष्ट्रीय शैक्षणिक धोरणाच्या अंमलबजावणीत मुंबई विद्यापीठाने आघाडी घेतली असताना विद्यार्थ्यांकडून अपेक्षित प्रतिसाद मिळालेला नाही. शिबिरांचे आयोजन आणि वारंवार सूचना देऊनही प्रक्रिया अपूर्ण राहिल्याने विद्यार्थ्यांसमोर गंभीर समस्या निर्माण होण्याची शक्यता आहे. वेळेत आयडी लिंक न केल्यास शैक्षणिक वर्षातील महत्त्वाची परीक्षाच हातची जाऊ शकते.
विद्यार्थ्यांनी आता अधिक उशीर न करता आपला एबीसी किंवा अपार आयडी तयार करून विद्यापीठाच्या पोर्टलशी जोडावा. महाविद्यालयीन अधिकाऱ्यांनीही विद्यार्थ्यांना मदत करावी, जेणेकरून कोणताही विद्यार्थी परीक्षेपासून वंचित राहणार नाही. ही प्रक्रिया पूर्ण झाल्यासच परीक्षा प्रवेशपत्र मिळेल आणि शैक्षणिक प्रवास अडथळ्यांशिवाय सुरू राहील.
