प्राध्यापक भरतीचा प्रस्ताव उच्च व शिक्षण विभागाने अर्थ विभागाकडे केला सादर

एज्युवार्ता न्यूज नेटवर्क 

प्राध्यापक भरतीची (Professor recruitment) तयारी करणाऱ्या तरुणांसाठी महत्त्वाची बातमी समोर आली आहे. राज्यातील सार्वजनिक विद्यापीठे आणि अनुदानित महाविद्यालयांमध्ये (Public universities and aided colleges) तब्बल १२ हजार ५२७ प्राध्यापकांच्या जागा रिक्त आहेत. त्यापैकी ४ हजार ३०० प्राध्यापकांची पदे भरण्यास मंजूरी देण्याचा प्रस्ताव चंद्रकांत पाटील (Chandrakant Patil) यांच्याकडे असलेल्या उच्च शिक्षण विभागाने (Department of Higher Education) अर्थ विभागाकडे सादर केला आहे. त्यामुळे उपमुख्यमंत्री व अर्थमंत्री अजित पवार यांच्या विभागाच्या निर्णयाकडे राज्यभरातील पात्रताधारक बेरोजगारांचे लक्ष लागले आहे.

राज्यातील सार्वजनिक ११ विद्यापीठे आणि १ हजार १७२ अनुदानित महाविद्यालयांमध्ये ३३ हजार ७६३ प्राध्यापकांची पदे मंजूर आहेत. त्यातील २१ हजार २३६ पदांवर प्राध्यापक कार्यरत असून, तब्बल १२ हजार ५२७ जागा रिक्त आहेत. एकूण मंजूर पदांच्या ३७.११ पदे रिक्त असल्यामुळे ‘एनईपी’ची अंमलबजाणी करताना मोठ्या अडचणींचा सामना करावा लागत असल्याचेही स्पष्ट झाले.  त्यामुळे उच्चशिक्षण विभागाने रिक्त पदांपैकी ४ हजार ३०० पदांच्या भरतीच्या मान्यतेसाठी वित्त विभागाकडे प्रस्ताव सादर केल्याचे समोर आली आहे. 

विद्यापीठ अनुदान आयाेगाने (यूजीसी) नवीन राष्ट्रीय शैक्षणिक धोरणाच्या प्रभावी अंमलबजावणीसाठी देशभरातील विद्यापीठे व महाविद्यालयातील ७५ टक्के जागा भरण्याचे आदेश  राज्य शासनांना नुकतेच दिले आहेत. त्यानुसार उच्चशिक्षण विभागाने ४ हजार ३०० प्राध्यापकांच्या  पद भरतीसाठी वित्त विभागाकडे प्रस्ताव सादर केला. उच्च शिक्षण विभागाने मागील पाच वर्षांत २ हजार ८८ पदांची भरती केलेली आहे.