कर्मवीर भाऊराव पाटील विद्यापीठाच्या कुलाधिकारीपदी सुप्रिया सुळे
विद्यापीठाचे प्रथम कुलाधिकारी तथा रयत शिक्षण संस्थेचे चेअरमन चंद्रकांत दळवी यांचा कार्यकाळ पूर्ण झाल्यानंतर सुळे यांच्यावर ही जबाबदारी सोपविण्यात आली.
Eduvarta
एज्युवार्ता न्यूज नेटवर्क
कर्मवीर भाऊराव पाटील विद्यापीठ, सातारा या समूह विद्यापीठाच्या नूतन कुलाधिकारीपदी खासदार सुप्रिया सुळे यांची नियुक्ती करण्यात आली आहे. महाराष्ट्राचे राज्यपाल तथा विद्यापीठाचे कुलपती जिष्णुदेव वर्मा यांनी १२ ऑगस्ट २०२६ रोजी जारी केलेल्या आदेशानुसार ही नियुक्ती झाली. सुप्रिया सुळे यांनी शनिवारी (२२ ऑगस्ट) विद्यापीठाच्या कुलाधिकारीपदाचा पदभार स्वीकारला.
विद्यापीठाचे प्रथम कुलाधिकारी तथा रयत शिक्षण संस्थेचे चेअरमन चंद्रकांत दळवी यांचा कार्यकाळ पूर्ण झाल्यानंतर सुळे यांच्यावर ही जबाबदारी सोपविण्यात आली. कुलगुरू डॉ. ज्ञानदेव म्हस्के, कुलसचिव, सांविधिक अधिकारी व अधिष्ठाता यांच्या उपस्थितीत दळवी यांनी पदभार सुप्रिया सुळे यांच्याकडे सुपूर्द केला. यावेळी विद्यापीठाच्या प्रशासकीय, शैक्षणिक आणि विविध उपक्रमांची माहिती त्यांना देण्यात आली.
कर्मवीर भाऊराव पाटील विद्यापीठाची स्थापना महाराष्ट्र शासनाने २७ ऑक्टोबर २०२१ रोजी राज्य सार्वजनिक विद्यापीठ म्हणून केली आहे. हे नॉन-अफिलिएटिंग विद्यापीठ असून यशवंतराव चव्हाण इन्स्टिट्यूट ऑफ सायन्स, छत्रपती शिवाजी कॉलेज आणि धनंजयराव गाडगीळ वाणिज्य महाविद्यालय ही त्याची घटक महाविद्यालये आहेत. विद्यापीठात कला, वाणिज्य आणि विज्ञान शाखांतील ८२ पदवी व पदव्युत्तर अभ्यासक्रम सुरू असून सुमारे आठ हजार विद्यार्थी शिक्षण घेत आहेत. तसेच २१ विषयांत पीएच.डी. अभ्यासक्रम सुरू आहेत.
पदभार स्वीकारल्यानंतर सुप्रिया सुळे यांनी ही नियुक्ती आपल्यासाठी सन्मानाची बाब असल्याचे सांगितले. कर्मवीर भाऊराव पाटील यांच्या सर्वसामान्य, ग्रामीण आणि वंचित विद्यार्थ्यांना दर्जेदार शिक्षण देण्याच्या विचारानुसार विद्यापीठाला अधिक सक्षम, गुणवत्तापूर्ण आणि समाजाभिमुख करण्यासाठी प्रयत्न करणार असल्याचे त्यांनी स्पष्ट केले. विद्यार्थ्यांना आधुनिक ज्ञान, कौशल्याधिष्ठित अभ्यासक्रम आणि संशोधनाच्या अधिकाधिक संधी उपलब्ध करून देण्यावर भर राहील, असेही त्यांनी सांगितले.
रयत शिक्षण संस्थेचे व्हाईस चेअरमन ॲड. भगीरथ शिंदे यांनी सुप्रिया सुळे यांचे स्वागत करून विद्यापीठाच्या शैक्षणिक गुणवत्तावाढीस आणि सर्वांगीण विकासाला त्यांच्या नेतृत्वामुळे नवी दिशा मिळेल, असा विश्वास व्यक्त केला.
