मॉडर्न कॉलेजचा वार्षिक क्रीडा पारितोषिक वितरण समारंभ

एज्युवार्ता न्यूज नेटवर्क 

प्रोग्रेसिव्ह एज्युकेशन सोसायटीच्या शिवाजीनगर येथील मॉडर्न कला विज्ञान व वाणिज्य महाविद्यालयातर्फे खेळाडूंच्या जिद्द, कर्तृत्व आणि यशाचा गौरव करण्यासाठी वार्षिक क्रीडा पारितोषिक वितरण समारंभ आयोजित करण्यात आला आहे. येत्या 27 ऑगस्ट रोजी सायंकाळी चार वाजता पुण्यातील शिवाजीनगर येथील प्रोग्रेसिव्ह एज्युकेशन सोसायटीच्या सभागृहात हा कार्यक्रम पार पडणार आहे. केंद्रीय राज्यमंत्री मुरलीधर मोहोळ या कार्यक्रमास उपस्थित राहणार आहेत. तर कार्यक्रमाचे अध्यक्षस्थान संस्थेचे कार्याध्यक्ष डॉ.गजानन एकबोटे भूषविणार आहेत.

महाविद्यालयाच्या प्राचार्या डॉ.निवेदिता एकबोटे या कार्यक्रमाच्या निमंत्रक आहेत. या कार्यक्रमात क्रीडा क्षेत्रात उज्वल कामगिरी केलेल्या खेळाडूंचा गौरव केला जाणार आहे. कार्यक्रमास पुण्याच्या प्रथम नागरिक महापौर मंजुषा नागपुरे, सावित्रीबाई फुले पुणे विद्यापीठाचे कुलगुरू डॉ.सुरेश गोसावी, भारतीय वर्ल्ड कप खो-खो विजेता संघाचे कर्णधार प्रतीक वाईकर, शिवाजीनगर मतदार संघाचे आमदार सिद्धार्थ शिरोळे संस्थेच्या सहकार्यवाह डॉ.ज्योत्सना एकबोटे, संस्थेचे सचिव शामकांत देशमुख यांची प्रमुख उपस्थिती आहे. तसेच महाविद्यालयाच्या जिमखाना व्यवस्थापन समितीचे चेअरमन डॉ.विजय गायकवाड, क्रीडा संचालक विक्रम फाले ,क्रीडा शिक्षक दीपक कुटे यांनी हे कार्यक्रमास उपस्थित असणार आहेत.

मॉडर्न महाविद्यालयातील खेळाडूंनी केवळ विद्यापीठच नाही तर राष्ट्रीय व आंतरराष्ट्रीय क्रीडा स्पर्धांमध्ये उज्वल कामगिरी केली आहे. महाविद्यालयाला अनेक वर्ष सावित्रीबाई फुले पुणे विद्यापीठातर्फे मानाचे क्रीडा पारितोषिक मिळालेले आहे. विद्यार्थ्यांच्या गुणांना वाव मिळावा, या उद्देशाने महाविद्यालयातील खेळाडूंना अधिकाधिक प्रोत्साहन दिले जाते. त्यातूनच उज्वल झालेल्या विद्यार्थ्यांचे कौतुक करण्यासाठी हा वार्षिक क्रीडा पारितोषिक वितरण समारंभ आयोजित करण्यात आला आहे.