नॅक मूल्यांकनाची प्रक्रिया पुढील महिन्यात सुरू होणार: डॉ. नितीन करमळकर

एज्युवार्ता न्यूज नेटवर्क

राष्ट्रीय शैक्षणिक धोरणाचा विचार करून नॅक मूल्यांकनाची नवीन नियमावली तयार करण्यात आली असून येत्या एक ते सव्वा महिन्यात नॅक मूल्यांकनाच्या प्रक्रियेला सुरूवात केली जाणार आहे. पूर्वीप्रमाणे कोणतीही समिती शैक्षणिक संस्थांना भेटी देऊन पाहणी करून मूल्यांकन करणार नाही. तर केवळ ऑनलाइन पद्धतीने सादर केलेल्या माहितीच्या आधारे नॅक मूल्यांकन केले जाणार आहे. तसेच चुकीची माहिती सादर केल्यास संबंधित संस्थेवर मोठी कारवाई केली जाणार आहे, असे सावित्रीबाई फुले पुणे विद्यापीठाचे माजी कुलगुरू डॉ.नितीन करमळकर यांनी सांगितले.

सावित्रीबाई फुले पुणे विद्यापीठातर्फे शिर्डी येथे प्राचार्य व संचालक यांच्या कार्यशाळेचे आयोजन करण्यात आले होते. या कार्यशाळेच्या समारोपप्रसंगी डॉ .नितीन करमळकर यांनी नव्या नॅक मूल्यांकन प्रक्रियेबाबत सादरीकरण केले. यावेळी विद्यापीठाचे प्र. कुलगुरू डॉ. पराग काळकर, विद्यापीठाच्या व्यवस्थापन परिषदेचे सदस्य डॉ. देविदास वायदंडे, डॉ.डी. बी. पवार, डॉ. नितीन घोरपडे, डॉ.संदीप पालवे, संगीता जगताप आदी उपस्थित होते.

करमळकर म्हणाले, नॅक मूल्यांकनासाठी बायनरी पद्धत आणली जाणार आहे. ग्रेड सिस्टीम पूर्णपणे बंद होणार आहे. नॅक मूल्यांकनात मागे असणाऱ्या संस्थांना मदत करण्यासाठी मेंटॉर म्हणून अनुभवी संस्था उपलब्ध करून दिली जाईल. सर्व शैक्षणिक संस्थांसाठी व सर्व ग्रामीण शहरी भागांसाठी एकाच नियमाच्या आधारे मूल्यांकित केले जाणार नाही. राष्ट्रीय व आंतरराष्ट्रीय स्तरावरील सुपरिचित संस्थांसाठी वेगळी कॅटेगरी असेल. नॅक मूल्यांकन केले किंवा केले नाही, अशा दोनच बाबी राहणार आहेत. तसेच मूल्यांकन केलेल्या संस्थांनाच शासनाच्या विविध संशोधन प्रकल्पासाठी निधी दिला जाणार आहे.

विद्यापीठ व महाविद्यालयांचा मॅक मूल्यांकनासाठी घेतला जाणारा डेटा हा सिंगल प्लॅटफॉर्मवरून घेतला जाईल. एनआयआरएफ सारख्या घटकांसाठी सुद्धा याच सिंगल प्लॅटफॉर्मवरून डेटा घेतला जाईल. त्यामुळे संस्थांना वारंवार डेटा भरावा लागणार नाही. शैक्षणिक संस्था आपला डेटा अपडेट करू शकतील, असेही करमळकर यांनी सांगितले.

कार्यक्रमाचे प्रास्ताविक डॉ. देविदास वायदंडे यांनी केले. तर डॉ. नितीन घोरपडे यांनी आभार मानले.