शिक्षक मतदार संघ निवडणूकीवरून टीडीएफमध्ये वाद; सचिन दुर्गाडे यांचा राजीनामा
टीडीएफमधील आजी माजी पदाधिकारी यांनी ज्याच्या विरोधात नेहमी संघर्ष केला. एकप्रकारे त्यांचा उमेदवार निवडणूकीसाठी उभा केला गेला, असे वैयक्तिकरित्या जाणवले, त्यामुळे मी टीडीएफचा नाही तर संघटनेच्या सचिव पदाचा राजीनामा दिला, असे दुर्गाडे यांनी सांगितले.
Eduvarta
एज्युवार्ता न्यूज नेटवर्क
पुणे शिक्षक मतदार संघातून टीडीएफतर्फे कौस्तुभ गावडे यांची उमेदवारी जाहीर झाल्यानंतर टीडीएफच्या पदाधिकाऱ्यांमध्ये वाद निर्माण झाला आहे.पुणे विभाग माध्यमिक शिक्षक संघाचे सचिव दुर्गाडे यांनी राजीनामा दिला आहे. त्यातच उमेदवारी देण्याच्या प्रक्रियेत काही आर्थिक गैरव्यवहाराच्या गोष्टी घडल्या असल्याची शिक्षण क्षेत्रात दबक्या आवाजात चर्चा आहे. मात्र, याबाबतचे कोणतेही पुरावे उपलब्ध नाहीत. परंतु, या सर्व घटनांमुळे शिक्षक निवडणुकीला वेगळे वळण लागले आहे.
दरम्यान सचिन दुर्गाडे यांनी राजीनामामा का दिला हे जाणून घेण्यासाठी एज्युवार्ताने त्यांच्याशी संपर्क साधला असता ते म्हणाले, एकूणच पुरोगामी विचाराधारेचा उमेदवार टीडीएफतर्फे निवडणुकीच्या रिंगणात उतरवण्याची मोठी परंपरा आहे. तसेच टीडीएफमधील आजी माजी पदाधिकारी यांनी ज्याच्या विरोधात नेहमी संघर्ष केला. एकप्रकारे त्यांचा उमेदवार निवडणूकीसाठी उभा केला गेला, असे वैयक्तिकरित्या जाणवले, त्यामुळे मी टीडीएफचा नाही तर संघटनेच्या सचिव पदाचा राजीनामा दिला, असे दुर्गाडे यांनी सांगितले.
पुरोगामी विचाराधारेचा उमेदवार आगामी शिक्षक मतदार संघाच्या निवडणुकीसाठी निवडला गेला नाही. त्यामुळे माझ्यासह संघटनेत काही पदाधिकारी नाराज आहेत. तसेच उमेदवारी देण्यात व्यवहार झाल्याचे आरोप कानावर येत आहेत. तसेच मला दुसऱ्या राजकीय पक्षाचे काम करायचे आहे,त्यामुळे मी हा राजीनामा देत आहे, असेही दुर्गाडे म्हणाले.
दरम्यान, कौस्तुभ गावडे यांची उमेदवारी जाहीर होताच टीडीएफमध्ये वाद निर्माण झाला आहे. तसेच शिक्षक मतदार संघातून निवडून जाणारा उमेदवार हा शिक्षकच असावा, अशी अपेक्षा व्यक्त केली जात आहे. त्यामुळे टीडीएकडून गावडे यांना उमेदवारी मिळावी असली तरी शिक्षक संघटना कोणाच्या बाजूने उभ्या राहणार हे पाहणे उत्सुकतेचे ठरणार आहे.
