मोशी येथील प्रियदर्शनी स्कूलमध्ये इयत्ता नववी ते बारावीच्या विद्यार्थ्यांसाठी करिअर मार्गदर्शन कार्यक्रमाचे आयोजन करण्यात आले. विद्यार्थ्यांना भविष्यातील करिअरविषयी योग्य आणि आत्मविश्वासपूर्ण निर्णय घेता यावा, हा या कार्यक्रमामागील प्रमुख उद्देश होता.

शाळेच्या बहुउद्देशीय सभागृहात सकाळी ९ ते १० या वेळेत झालेल्या या कार्यक्रमात CA हिमांशू चौधरी, चार्टर्ड अकाउंटंट व करिअर मार्गदर्शन तज्ज्ञ यांनी विद्यार्थ्यांना मार्गदर्शन केले. विशेष म्हणजे, हिमांशू चौधरी हे प्रियदर्शनी स्कूलचे माजी विद्यार्थी आहेत.

यावेळी विद्यार्थ्यांना योग्य शाखा निवड, भविष्यातील शैक्षणिक वाटचाल तसेच विविध व्यावसायिक अभ्यासक्रमांबाबत सविस्तर माहिती देण्यात आली. वित्त, अर्थशास्त्र आणि शेअर मार्केट या क्षेत्रांतील करिअरच्या विविध संधींवर प्रकाश टाकण्यात आला. तसेच CA, CS, Law, Management यांसह विविध उदयोन्मुख क्षेत्रांतील व्यावसायिक अभ्यासक्रम आणि त्यामधील करिअरच्या संधींची माहिती विद्यार्थ्यांना देण्यात आली. विविध उद्योग आणि क्षेत्रांमध्ये वाढत असलेल्या रोजगार व करिअरच्या संधींबाबतही मार्गदर्शन करण्यात आले.

परस्परसंवादी पद्धतीने झालेल्या या मार्गदर्शन सत्रातून विद्यार्थ्यांना आपल्या क्षमता, आवडी आणि करिअरच्या आकांक्षा ओळखण्यास प्रोत्साहन मिळाले. या कार्यक्रमामुळे विद्यार्थ्यांच्या विविध करिअर पर्यायांविषयीच्या ज्ञानात निश्चितच भर पडल्याची भावना विद्यार्थ्यांनी व्यक्त केली. विद्यार्थ्यांना योग्य दिशा, आवश्यक ज्ञान आणि आत्मविश्वास देणारा हा उपक्रम अत्यंत उपयुक्त ठरला असून, शाळा व्यवस्थापनाने या उपक्रमाचे कौतुक केले.