11th Admission : मुलींच्या अकरावी विशेष प्रवेश फेरीचे वेळापत्रक जाहीर: १३ जुलैला गुणवत्ता यादी
नवीन नोंदणी, अर्ज दुरुस्ती, पसंतीक्रम भरणे आणि अर्ज अंतिम करण्याची प्रक्रिया १० आणि ११ जुलै रोजी पार पडणार आहे. १३ जुलै रोजी गुणवत्ता यादी आणि कट-ऑफ जाहीर करण्यात येणार आहेत.
eduvarta@gmail.com 
एज्युवार्ता न्यूज नेटवर्क
राज्यातील इयत्ता अकरावीच्या केंद्रीय ऑनलाइन प्रवेश प्रक्रियेत (11th Admission Process) मुलींसाठी विशेष फेरी (Special Round for girls) सुरू करण्यात येत आहे. माध्यमिक व उच्च माध्यमिक शिक्षण संचालनालयाने (Directorate of Education) या फेरीचे संपूर्ण वेळापत्रक जाहीर (Schedule announced) केले आहे. यामुळे अनेक विद्यार्थिनींना चांगल्या महाविद्यालयात प्रवेश मिळण्याची संधी उपलब्ध होणार आहे. आतापर्यंत तीन नियमित फेऱ्या आणि एक विशेष फेरी पूर्ण झाल्यानंतरही रिक्त जागा भरण्यासाठी ही विशेष मुलींसाठीची फेरी राबवली जात आहे.
नवीन नोंदणी, अर्ज दुरुस्ती, पसंतीक्रम भरणे आणि अर्ज अंतिम करण्याची प्रक्रिया १० आणि ११ जुलै रोजी पार पडणार आहे. १३ जुलै रोजी गुणवत्ता यादी आणि कट-ऑफ जाहीर करण्यात येणार आहेत. १३ आणि १४ जुलै या दोन दिवसांत विद्यार्थिनींना प्रवेश निश्चित करणे, नाकारणे किंवा रद्द करण्याची सुविधा उपलब्ध असेल. या फेरीनंतर १४ जुलैला पुढील विशेष फेरीचे वेळापत्रक जाहीर होईल, अशी माहिती संचालक डॉ. महेश पालकर यांनी दिली आहे.
राज्यातील ९ हजार ६८८ कनिष्ठ महाविद्यालयांमध्ये अकरावी प्रवेश प्रक्रिया सुरू असून, आतापर्यंत १४ लाख ७३ हजार ४२० विद्यार्थ्यांनी नोंदणी केली आहे. यापैकी १० लाख ८ हजार ९४ विद्यार्थ्यांनी प्रवेश निश्चित केला आहे. पहिल्या विशेष फेरीत ४ लाख ८४ हजार ८६५ विद्यार्थ्यांनी सहभाग नोंदवला होता. त्यातील ३ लाख ९२ हजार ६९३ विद्यार्थ्यांना महाविद्यालय वाटप झाले असून, ७ जुलैपर्यंत ३ लाख २४ हजार १०२ विद्यार्थ्यांनी प्रवेश घेतला आहे.
राज्यातील सर्व उच्च माध्यमिक शाळा आणि कनिष्ठ महाविद्यालयांमध्ये नियमित वर्ग आणि अध्यापन १५ जुलैपासून सुरू होणार आहे. त्यामुळे विद्यार्थ्यांनी वेळापत्रकानुसार प्रक्रिया पूर्ण करणे आवश्यक आहे. मुलींसाठीच्या या विशेष फेरीमुळे लैंगिक समानता आणि शिक्षणातील समावेशकता वाढण्यास मदत होईल, असे शिक्षण विभागाचे मत आहे.
रिक्त जागांची यादी १६ जुलै रोजी जाहीर करण्यात येणार असल्याने विद्यार्थिनींनी नियमितपणे संकेतस्थळ तपासणे गरजेचे आहे. ही फेरी यशस्वी झाल्यास अकरावी प्रवेश प्रक्रिया अधिक पारदर्शक आणि प्रभावी ठरेल. विद्यार्थ्यांनी अर्ज भरताना सर्व कागदपत्रे तयार ठेवावीत आणि मुदतीचा काटेकोरपणे पालन करावे, असे आवाहन संचालनालयाने केले आहे.
