फर्ग्युसनची विद्यार्थीनी गीता मालुसरेने पार केली 'इंग्लिश खाडी'!

एज्युवार्ता न्यूज नेटवर्क 

जिद्द, अदम्य इच्छाशक्ती आणि अथांग समुद्रालाही गवसणी घालण्याचे धाडस यांच्या जोरावर भारताची जलपरी म्हणून प्रसिद्ध असलेल्या मुळशीच्या गीता दीपा महेश मालुसरे हिने इतिहास रचला आहे. गीताने जागतिक जलतरण क्षेत्रातील अत्यंत आव्हानात्मक मानली जाणारी 'इंग्लिश खाडी' (इंग्लिश चॅनेल) यशस्वीरीत्या नुकतीच पार केली. प्रतिकूल परिस्थिती आणि शारीरिक वेदनांवर मात करत मिळवलेले तिचे हे यश सध्या जगभरात कौतुकाचा विषय ठरले आहे.

इंग्लिश चॅनेलचे थेट अंतर ३५ किलोमीटर असले, तरी शनिवारी समुद्रातील तीव्र लाटा आणि प्रतिकूल हवामानामुळे गीताला प्रत्यक्ष पोहताना तब्बल ५४ किलोमीटरचे आव्हानात्मक अंतर पार करावे लागले. हे अथांग अंतर तिने १४ तास ३१ मिनिटांत पूर्ण केले. 'इंग्लिश चॅनेल स्विमिंग असोसिएशन' या संस्थेच्या अधिकृत निगराणीखाली ही मोहीम पार पडली. आंतरराष्ट्रीय कोच शेखर खासनीस आणि प्रतिक जावडेकर यांच्या मार्गदर्शनाखाली गीताने या मोहिमेची तयारी केली होती.

 फर्ग्युसन कॉलेजमधून पदवीचे शिक्षण घेणाऱ्या गीताचा हा प्रवास अत्यंत संघर्षमय राहिला आहे. वयाच्या अवघ्या तिसऱ्या वर्षापासून तिने पोहायला सुरुवात केली. २०१७ मध्ये वयाच्या १३ व्या वर्षी तिने मुंबईच्या समुद्रात ३२ किलोमीटरचे अंतर ६ तास २६ मिनिटांत पार करून विक्रम रचला होता. मात्र, त्यानंतर तिच्या आयुष्यात संकटांची मालिका सुरू झाली. २०२०-२१ मधील कोरोना संकटामुळे तिच्या सरावाला दोन वर्षे मोठा ब्रेक लागला.

 नोव्हेंबर २०२२ मध्ये रत्नागिरी येथील सागरी स्पर्धेत पोहत असताना गीताला 'जेलीफिश' या अत्यंत विषारी जलचराचा तीव्र दंश झाला. यात तिचा हात निकामी होण्याचा धोका निर्माण झाला होता. तिच्या हातावर एका वर्षात तब्बल ११ शस्त्रक्रिया कराव्या लागल्या. अनेकांना वाटले की गीताचे स्विमिंग करिअर आता संपले, मात्र तिने हार मानली नाही.

या जीवघेण्या जखमांवर मात करत गीताने गेल्या वर्षभरात रोज ८ ते १० तास सराव केला. हातावरच्या खोल जखमा पूर्ण सुकलेल्या नसताना, हातातून रक्त येत असतानाही तिने सराव थांबवला नाही. इंग्लिश खाडी पोहत असतानाही तिला जुन्या जखमांचा असह्य त्रास होत होता. इतकेच नव्हे तर, आठ दिवसांपूर्वी इंग्लंडमध्ये सराव करताना पुन्हा एकदा तिला जेलीफिशने दंश केला होता; सुदैवाने तो विषारी नव्हता, पण त्याचे मानसिक दडपण मोठे होते. या सर्व वेदनांकडे दुर्लक्ष करत तिने आपले लक्ष केवळ ध्येयावर केंद्रित केले आणि अखेर विजय मिळवला.

 'क्वीन ऑफ ओशन' (Queen of Ocean) हा बहुमान मिळवणे हे गीताचे मुख्य ध्येय असून, यासाठी तिला जगातील सात प्रमुख खाड्या पोहायच्या आहेत. इंग्लिश खाडी पार करून तिने या मोहिमेची शानदार सुरुवात केली आहे. याच मोहिमेचा भाग म्हणून गीता या वर्षी ऑगस्टमध्ये न्यूयॉर्कमधील ४६ किलोमीटरची 'ट्वेंटी ब्रीजेस' आणि सप्टेंबरमध्ये कॅलिफोर्नियातील ३२ किलोमीटरची 'कॅटेलिना चॅनेल' पोहण्यासाठी सज्ज झाली आहे.