मोझे अभियांत्रिकी महाविद्यालयात आंतरराष्ट्रीय परिषद संपन्न

एज्युवार्ता न्यूज नेटवर्क 

वाघोली येथील पार्वतीबाई गेनबा मोझे अभियांत्रिकी महाविद्यालयात  "इंटरनॅशनल कॉन्फरन्स ऑन इमर्जिंग अॅडव्हान्सेस इन इंजिनिअरिंग, मॅनेजमेंट अँड फार्मसी (ICEAEMP-2026)" या दोन दिवसीय आंतरराष्ट्रीय परिषदेचे यशस्वी आयोजन करण्यात आले. देशभरातील विविध विद्यापीठे, संशोधन संस्था आणि औद्योगिक क्षेत्रातील संशोधकांकडून १५० हून अधिक संशोधन निबंध परिषदेस प्राप्त झाले. तज्ज्ञ समितीच्या परीक्षणानंतर निवडक संशोधन निबंध स्कोपस व एससीआय सूचीबद्ध आंतरराष्ट्रीय संशोधन नियतकालिकांमध्ये प्रकाशनासाठी निवडण्यात आले.

परिषदेचे उद्घाटन संशोधन व विकास क्षेत्रातील तज्ज्ञ डॉ. जितेंद्र होले यांच्या हस्ते झाले. यावेळी प्रभारी प्राचार्य डॉ. सोमनाथ कोलगिरी, फार्मसी महाविद्यालयाचे प्राचार्य डॉ. तुषार शेळके आणि संशोधन व विकास अधिष्ठाता डॉ. रितेश सुधाकर फेगडे उपस्थित होते. तसेच सावित्रीबाई फुले पुणे विद्यापीठाचे माजी अधिष्ठाता डॉ. प्रमोद पाटील यांनी ऑनलाइन माध्यमातून संशोधनातील गुणवत्ता, नावीन्य आणि उद्योगाभिमुख संशोधनाचे महत्त्व स्पष्ट केले.

परिषदेत थायलंडमधील पायप विद्यापीठाच्या इंटरनॅशनल कॉलेजचे डॉ. वानुस श्रीमहाराज यांनी आंतरराष्ट्रीय प्रमुख वक्ते म्हणून मार्गदर्शन केले. तसेच डॉ. निखिल बरैया, डॉ. बालाजी आर. आणि डॉ. रुपेंद्र शरद नेहेते यांनी स्मार्ट मटेरियल्स, हरित ऊर्जा, कृत्रिम बुद्धिमत्ता, औषधनिर्माण, उद्योजकता, स्टार्टअप्स आणि शाश्वत विकास यांसारख्या समकालीन विषयांवर व्याख्याने दिली. संशोधकांना तज्ज्ञांशी संवाद साधण्याची, संशोधनातील नवीन संकल्पना मांडण्याची आणि जागतिक स्तरावरील संशोधनाची माहिती मिळविण्याची संधी या परिषदेमुळे उपलब्ध झाली.

परिषदेचे संपूर्ण नियोजन व समन्वय डॉ. रितेश सुधाकर फेगडे यांच्या नेतृत्वाखाली पार पडले. प्रा. हर्षदा शेळके व डॉ. सैफुल हक यांनीही आयोजनात महत्त्वपूर्ण योगदान दिले. संस्थेचे अध्यक्ष रामभाऊ मोझे, उपाध्यक्ष ज्ञानेश्वर मोझे, विभागप्रमुख, प्राध्यापक, आयोजन समिती, तांत्रिक समित्या आणि विद्यार्थी स्वयंसेवक यांच्या सहकार्यामुळे परिषद यशस्वी झाली. संशोधन, नवोपक्रम आणि उद्योग-शैक्षणिक संस्थांमधील सहकार्याला चालना देणारी ही परिषद महाविद्यालयाच्या संशोधन क्षेत्रातील महत्त्वाचा टप्पा ठरल्याची भावना यावेळी व्यक्त करण्यात आली.