बीबीए, बीएमएस, बीबीएम, बीसीएसह व्यावसायिक अभ्यासक्रमांच्या CAP प्रवेश नोंदणीला सुरुवात
विद्यार्थ्यांना १६ जुलै २०२६ रोजी सायंकाळी ५ वाजेपर्यंत ऑनलाइन नोंदणी करता येणार आहे. सीईटी सेल तर्फे एप्रिल २०२६ मध्ये MAH CET परीक्षा दिलेल्या विद्यार्थ्यांनी प्रवेश प्रक्रियेसाठी नोंदणी करण्याची आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षातर्फे शैक्षणिक वर्ष २०२६-२७ साठी बीबीए, बीएमएस, बीबीएम, बीसीए, एमबीए (इंटिग्रेटेड) आणि एमसीए (इंटिग्रेटेड) या व्यावसायिक अभ्यासक्रमांच्या प्रवेश प्रक्रियेला अर्थात (CAP) नोंदणीला सोमवारपासून सुरुवात झाली आहे. इच्छुक विद्यार्थ्यांना १६ जुलै २०२६ रोजी सायंकाळी ५ वाजेपर्यंत ऑनलाइन नोंदणी करता येणार आहे. सीईटी सेल तर्फे एप्रिल २०२६ मध्ये MAH CET परीक्षा दिलेल्या विद्यार्थ्यांनी प्रवेश प्रक्रियेसाठी नोंदणी करण्याची आहे.
यंदा राज्याचे उच्च व तंत्रशिक्षण मंत्री चंद्रकांत पाटील यांच्या निर्णयानुसार PCM आणि PCB गटातील MAH CET २०२६ दिलेल्या विद्यार्थ्यांनाही बीबीए, बीएमएस, बीबीएम आणि बीसीए अभ्यासक्रमांसाठी प्रवेशाची संधी उपलब्ध करून देण्यात आली होती. प्रवेश नियमांनुसार पात्र असलेल्या या विद्यार्थ्यांनीही CAP प्रक्रियेत सहभागी व्हावे, असे सीईटी कक्षाने स्पष्ट केले आहे.
प्रवेशासाठी अर्ज करताना विद्यार्थ्यांनी आवश्यक कागदपत्रे स्कॅन करून अपलोड करावीत. कागदपत्र पडताळणीसाठी ई-स्क्रूटिनी (E-Scrutiny) आणि फिजिकल स्क्रूटिनी (Physical Scrutiny) असे दोन पर्याय उपलब्ध आहेत. ई-स्क्रूटिनीची निवड केल्यास संपूर्ण पडताळणी ऑनलाइन होणार असून विद्यार्थ्यांना प्रत्यक्ष उपस्थित राहण्याची आवश्यकता नाही. तर फिजिकल स्क्रूटिनी निवडणाऱ्या विद्यार्थ्यांना जवळच्या स्क्रूटिनी सेंटर किंवा फॅसिलिटेशन सेंटरमध्ये जाऊन कागदपत्रांची पडताळणी करावी लागणार आहे.
सीईटी कक्षाने स्पष्ट केले आहे की, MAH CET २०२६ साठी नोंदणी केलेल्या विद्यार्थ्यांकडून CAP नोंदणीसाठी कोणतेही शुल्क आकारले जाणार नाही. मात्र, NRI, OCI, PIO, आखाती देशांतील भारतीय कामगारांची मुले तसेच परदेशी नागरिक या प्रवर्गातील उमेदवारांना नियमानुसार शुल्क भरावे लागेल.
प्रवेश प्रक्रियेनुसार ७ ते १७ जुलै दरम्यान अर्जांची पडताळणी होईल. १९ जुलै रोजी तात्पुरती गुणवत्ता यादी प्रसिद्ध केली जाईल. त्यावरील हरकती २० ते २२ जुलै या कालावधीत स्वीकारल्या जातील तर २४ जुलै रोजी अंतिम गुणवत्ता यादी जाहीर करण्यात येणार आहे.
दरम्यान, या अभ्यासक्रमांसाठीची MAH CET परीक्षा २८ ते ३० एप्रिल २०२६ दरम्यान घेण्यात आली होती. या परीक्षेला ६२ हजार ३०१ विद्यार्थी बसले होते. परीक्षेचा निकाल ११ जून २०२६ रोजी जाहीर करण्यात आला असून, अधिक माहितीसाठी विद्यार्थ्यांनी www.mahacet.org या संकेतस्थळाला भेट द्यावी, असे आवाहन सीईटी कक्षाने केले आहे.
