TET Exam : शिक्षक पात्रता परीक्षा IBPS घेणार; राज्य परीक्षा परिषदेचे IBPS ला पत्र

एज्युवार्ता न्यूज नेटवर्क 

महाराष्ट्र शिक्षक पात्रता परीक्षा (MAHATET) २०२६ च्या आयोजनाबाबत महत्त्वाची घडामोड समोर आली आहे. महाराष्ट्र राज्य परीक्षा परिषदेने ही परीक्षा ऑनलाइन पद्धतीने आणि पूर्णपणे पारदर्शक वातावरणात घेण्यासाठी नामांकित संस्था 'आयबीपीएस'ला (IBPS) अधिकृत पत्र पाठवले आहे. परिषदेचे आयुक्त महेश चोधे यांच्या स्वाक्षरीने पाठवलेल्या या पत्रात परीक्षेच्या सुरक्षित, विश्वासार्ह आणि जलद आयोजनाची विनंती करण्यात आली आहे. यामुळे पेपरफुटी प्रकरणानंतर उमेदवारांमध्ये निर्माण झालेला अविश्वास दूर करण्यास मदत होईल. 

यापूर्वी २८ जून २०२६ रोजी ही परीक्षा आयोजित करण्यात आली होती. पेपर १ साठी २ लाख ५८ हजार ६१ आणि पेपर २ साठी ३ लाख ४२ हजार ६४ असे एकूण ६ लाख ९२५ उमेदवारांनी अर्ज भरले होते. राज्यभरात १ हजार ७२९ परीक्षा केंद्रे निश्चित करण्यात आली होती. मात्र, काही कारणास्तव परीक्षा पुढे ढकलण्यात आली. आता ही परीक्षा नव्याने पूर्णपणे ऑनलाइन स्वरूपात घेण्याच्या दिशेने हालचाली सुरू झाल्या आहेत. 

सर्वोच्च न्यायालयाने १ सप्टेंबर २०२५ रोजी दिलेल्या निकालानुसार, सेवेतील शिक्षकांसाठी टीईटी उत्तीर्ण होणे अनिवार्य करण्यात आले आहे. यासाठी २०२८ पर्यंत मुदत देण्यात आली आहे. या न्यायालयीन आदेशामुळे हजारो शिक्षकांसाठी ही परीक्षा अत्यंत महत्त्वाची ठरली आहे. परीक्षा परिषद आता वर्षातून किमान दोनदा टीईटी घेण्याचे नियोजन करत आहे. यापुढील सर्व परीक्षा ऑनलाइन पद्धतीने घेण्याचा शासनाचा निर्णय आहे. 

आयबीपीएसकडे ही जबाबदारी सोपवण्यामागे परीक्षेची पारदर्शकता, सुरक्षा आणि विश्वासार्हता वाढवणे हा मुख्य उद्देश आहे. परीक्षा परिषदेने जिल्हानिहाय सविस्तर माहिती आणि सांख्यिकीय आकडेवारी IBPS ला उपलब्ध करून दिली आहे. शालेय शिक्षण विभागाचे प्रधान सचिव आणि शिक्षण आयुक्त यांनाही या पत्राची प्रत पाठवण्यात आली आहे. यामुळे लवकरच नवीन परीक्षा तारखा जाहीर होण्याची शक्यता आहे. लाखो उमेदवार आता परीक्षेच्या नवीन तारखेकडे लक्ष ठेवून आहेत. हा निर्णय टीईटी परीक्षेच्या गुणवत्ता आणि विश्वासार्हतेला बळकटी देणारा ठरेल, अशी अपेक्षा व्यक्त केली जात आहे.