अतिवृष्टीच्या पार्श्वभूमीवर पुणे जिल्ह्यातील केवळ 'या' शाळांना ७ जुलैला सुट्टी; जिल्हाधिकारी यांचे आदेश 

एज्युवार्ता न्यूज नेटवर्क 

 भारतीय हवामान विभागाने पुणे जिल्ह्यासाठी दिलेल्या अतिवृष्टीच्या इशाऱ्याच्या पार्श्वभूमीवर जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष जितेंद्र डूडी यांनी जुन्नर, आंबेगाव, खेड, मावळ, मुळशी, राजगड आणि भोर या सात तालुक्यांतील सर्व शाळा व अंगणवाड्यांना मंगळवारी  ७ जुलै २०२६ रोजी सुट्टी जाहीर केली आहे.

जिल्ह्यातील घाट परिसरात मोठ्या प्रमाणात अतिवृष्टी होत असून दरड कोसळण्याच्या घटनाही घडल्या आहेत. तसेच ७ जुलै रोजी संबंधित तालुक्यांसाठी ऑरेंज अलर्ट जारी करण्यात आल्याने विद्यार्थ्यांच्या सुरक्षिततेच्या दृष्टीने हा निर्णय घेण्यात आला आहे.

सुट्टीचा आदेश प्राथमिक, माध्यमिक आणि उच्च माध्यमिक शाळा, जिल्हा परिषद व नगरपालिका शाळा, आश्रमशाळा, अनुदानित व विनाअनुदानित खाजगी शाळा, इंग्रजी माध्यमाच्या शाळा तसेच सर्व अंगणवाड्यांना लागू राहणार आहे.

मात्र, या कालावधीत सर्व मुख्याध्यापक, शिक्षक आणि शिक्षकेत्तर कर्मचारी यांनी नियमित कार्यालयीन वेळेत शाळेत उपस्थित राहून स्थानिक प्रशासनाच्या निर्देशानुसार आपत्ती व्यवस्थापनाशी संबंधित कामकाजात सहकार्य करावे, असे आदेशात नमूद करण्यात आले आहे.

दरम्यान, नागरिकांनी हवामान विभाग आणि प्रशासनाच्या सूचनांचे पालन करावे, अनावश्यक प्रवास टाळावा तसेच अत्यावश्यक काम असल्यासच घराबाहेर पडावे, असे आवाहन जिल्हा प्रशासनाने केले आहे.