नवोदय विद्यालय सहावी प्रवेश परीक्षा; ३१ जुलै २०२६ पर्यंत करता येणार ऑनलाइन अर्ज
प्रवेशासाठी पात्रता निकष कठोर आहेत. विद्यार्थी शैक्षणिक वर्ष २०२६-२७ मध्ये इयत्ता पाचवीत शिकत असावा. जन्म १ मे २०१५ ते ३१ जुलै २०१७ दरम्यान झालेला असावा. तसेच इयत्ता तिसरी, चौथी आणि पाचवीचे पूर्ण वर्ष मान्यताप्राप्त शाळेतून उत्तीर्ण केलेले असणे आवश्यक आहे.
eduvarta@gmail.com 
एज्युवार्ता न्यूज नेटवर्क
नवोदय विद्यालय समितीने (NVS) शैक्षणिक वर्ष २०२७-२८ साठी (Academic year 2027-28) इयत्ता सहावीच्या प्रवेश परीक्षेची (Entrance Exam for Class 6) अधिकृत अधिसूचना जाहीर (Notification issued) केली आहे. ग्रामीण भागातील गुणवंत विद्यार्थ्यांना मोफत आणि दर्जेदार शिक्षण उपलब्ध करून देण्याच्या उद्देशाने राबवल्या जाणाऱ्या या योजनेचा लाभ घेण्यासाठी इच्छुक विद्यार्थ्यांना ३१ जुलै २०२६ पर्यंत ऑनलाइन अर्ज (Deadline for online applications July 31) करण्याचे आवाहन करण्यात आले आहे.
प्रवेशासाठी पात्रता निकष कठोर आहेत. विद्यार्थी शैक्षणिक वर्ष २०२६-२७ मध्ये इयत्ता पाचवीत शिकत असावा. जन्म १ मे २०१५ ते ३१ जुलै २०१७ दरम्यान झालेला असावा. तसेच इयत्ता तिसरी, चौथी आणि पाचवीचे पूर्ण वर्ष मान्यताप्राप्त शाळेतून उत्तीर्ण केलेले असणे आवश्यक आहे. अर्ज प्रक्रिया पूर्णपणे ऑनलाइन असून, अधिकृत वेबसाइटवरून अर्ज भरता येईल. उशिरा आलेले अर्ज स्वीकारले जाणार नाहीत.
जवाहर नवोदय विद्यालय निवड चाचणी २८ नोव्हेंबर २०२६ रोजी सकाळी ११:३० ते दुपारी १:३० या वेळेत घेतली जाईल. ही परीक्षा १०० गुणांची असेल आणि ८० वस्तुनिष्ठ प्रश्न विचारले जातील. परीक्षेत गणित, बुद्धिमत्ता आणि भाषा कौशल्य यांचा समावेश असेल. यशस्वी उमेदवारांना नवोदय विद्यालयात प्रवेश मिळेल.
नवोदय विद्यालये पूर्णपणे निवासी आणि सह-शिक्षण देणारी सरकारी शाळा आहेत. सध्या देशात २७ राज्ये आणि ८ केंद्रशासित प्रदेशांमध्ये ६६५ विद्यालये कार्यरत आहेत. महाराष्ट्रात ३३+१ अशी विद्यालये कार्यान्वित आहेत. येथे विद्यार्थ्यांना मोफत शिक्षण, निवास, भोजन, गणवेश आणि पाठ्यपुस्तके उपलब्ध करून दिली जातात. राष्ट्रीय एकात्मतेसाठी ‘मायग्रेशन स्कीम’ अंतर्गत विद्यार्थ्यांना एका वर्षासाठी दुसऱ्या भाषिक राज्यात शिकण्याची संधी मिळते.
ही योजना ग्रामीण भागातील हुशार विद्यार्थ्यांसाठी जीवन बदलणारी ठरते. इच्छुक पालक आणि विद्यार्थ्यांनी तात्काळ अधिकृत NVS वेबसाइटवर जाऊन अर्ज प्रक्रिया पूर्ण करावी. अधिक माहितीसाठी NVS च्या अधिसूचनेत दिलेल्या सूचना काळजीपूर्वक वाचण्याचे आवाहन करण्यात आले आहे.
