मोठी बातमी: MPSC परीक्षेमुळे सेट परीक्षा पुढे ढकलली 

एज्युवार्ता न्यूज नेटवर्क 

सावित्रीबाई फुले पुणे विद्यापीठाच्या सेट परीक्षा विभागामार्फत महाराष्ट्र व गोवा राज्यासाठी आयोजित करण्यात आलेली ४१ वी राज्य पात्रता परीक्षा (SET) पुढे ढकलण्यात आली आहे. येत्या २६ जुलै २०२६ रोजी होणाऱ्या सेट परीक्षेची संभाव्य नवीन तारीख ६ सप्टेंबर २०२६ जाहीर करण्यात आली आहे. अंतिम परीक्षा वेळापत्रक पुढील १५ दिवसांत प्रसिद्ध करण्यात येणार असल्याची माहिती सेट विभागाने दिली आहे.

सावित्रीबाई फुले पुणे विद्यापीठाचा सेट परीक्षा विभाग हा महाराष्ट्र शासनाची नोडल एजन्सी असून, विद्यापीठ अनुदान आयोगाच्या (UGC) मार्गदर्शक तत्त्वांनुसार महाराष्ट्र व गोवा राज्यातील विद्यापीठे आणि वरिष्ठ महाविद्यालयांमध्ये सहायक प्राध्यापक पदासाठी आवश्यक असलेली राज्य पात्रता परीक्षा (SET) आयोजित करतो.

यंदा ४१ वी सेट परीक्षा २६ जुलै २०२६ रोजी नियोजित होती. मात्र, त्याच दिवशी महाराष्ट्र लोकसेवा आयोगामार्फत (MPSC) सरळसेवा भरतीअंतर्गत विविध विषयांच्या परीक्षा आयोजित करण्यात आल्याने अनेक विद्यार्थ्यांना दोन्हीपैकी एकाच परीक्षेला उपस्थित राहणे शक्य होणार होते. त्यामुळे विद्यार्थ्यांचे शैक्षणिक नुकसान होण्याची शक्यता निर्माण झाली होती.

याशिवाय, ७ जुलै ते २५ जुलैदरम्यान आषाढी वारीमुळे राज्यातील अनेक मार्गांवर वाहतूक व्यवस्था प्रभावित होण्याची शक्यता असल्याने परीक्षार्थींना परीक्षा केंद्रांवर वेळेत पोहोचण्यात अडचणी येऊ शकतात. या पार्श्वभूमीवर परीक्षा पुढे ढकलण्याची मागणी करणारी अनेक निवेदने विद्यार्थ्यांकडून सेट विभागाकडे प्राप्त झाली होती.

विद्यार्थ्यांची मागणी आणि निर्माण झालेली परिस्थिती लक्षात घेऊन कोणताही विद्यार्थी सेट परीक्षेपासून वंचित राहू नये, या उद्देशाने २६ जुलैची परीक्षा पुढे ढकलण्याचा निर्णय घेण्यात आला आहे. त्यानुसार परीक्षेची संभाव्य नवीन तारीख ६ सप्टेंबर २०२६ निश्चित करण्यात आली आहे.

दरम्यान, या संभाव्य तारखेबाबतही काही शैक्षणिक किंवा प्रशासकीय अडचणी निदर्शनास आल्यास त्यांची पडताळणी करून अंतिम परीक्षा तारीख व सविस्तर वेळापत्रक पुढील १५ दिवसांत जाहीर करण्यात येणार असल्याचे सेट विभागाने स्पष्ट केले आहे, असे विद्यापीठातर्फे स्पष्ट करण्यात आले आहे.