नोंदणी मुद्रांकन विभाग परीक्षेच्या तारखा आणि प्रवेशपत्र जाहीर

एज्युवार्ता न्यूज नेटवर्क 

नोंदणी व मुद्रांक विभागातील (Registration and Stamps Department) भरती परीक्षेच्या तारखा आणि प्रवेशपत्र जाहीर (Admit card released) करण्यात आले आहेत. या भरती मोहिमेत सहभागी झालेल्या विद्यार्थ्यांना (इंस्टीट्यूट ऑफ बँकीग पर्सोनेल सिलेक्शन) IBPS च्या अधिकृत संकेतस्थळावर परीक्षेचे सविस्तर वेळापत्रक पाहायला मिळणार आहे. भरती प्रक्रियेसाठी अर्ज भरलेल्या आणि पात्र असलेल्या उमेदवारांची 1 जुलै ते 8 जुलै 2025 या कालावधीत ऑनलाईन परीक्षा (Online Exam from 1st July to 8th July 2025) घेण्यात येणार आहे. सदर परीक्षेचे प्रवेशपत्र उमेदवारास त्यांनी नोंदणी केलेल्या ई-मेलवर IBPS कडून पाठविण्यात येणार असल्याचे सांगण्यात आले आहे.  

नोंदणी मुद्रांकन विभागातील शिपाई गट-ड संवर्गात 284 रिक्त पदे भरती करीता 22 एप्रिल 2025 रोजी जाहिरात प्रसिध्द करण्यात आली होती. सदर भरती प्रक्रिया पुर्ण करण्याकामी ऑनलाईन पध्दतीने अर्ज स्विकारण्याकरिता, तसेच ऑनलाईन पध्दतीने परीक्षेचे आयोजन करण्याकरिता IBPS कंपनीस नियुक्त केले आहे, व त्यानुसार IBPS कडून दिनांक 22 एप्रिल  26 मे 2025 दरम्यान ऑनलाईन पध्दतीने अर्ज भरण्याची प्रक्रिया राबवण्यात आली. त्यानंतर आता परीक्षेसंर्भात तारखा जाहीर करण्यात आल्या आहेत.

या परीक्षेकरीता विभागाकडून कोणत्याही इतर एजन्सीची वा संस्थेची मध्यस्थाची नेमणूक करण्यात आलेली नाही. जर याबाबत कोणती व्यक्ती, संस्थेकडून, मध्यस्थ अथवा तशी बतावणी करण्यात येत असल्यास अशा व्यक्ती वा संस्थेपासून उमेदवारांनी कृपया सावध राहावे असे आवाहन नोंदणी व मुद्रांक विभागातर्फे करण्यात आले आहे.