MPSC परीक्षेतील टॉपर ४५ लाखांची लाच घेताना ACB च्या जाळ्यात; शैक्षणिक गुणवत्तेवर प्रश्नचिन्ह
शैक्षणिक क्षेत्रात ही घटना मोठी चिंतेची बाब मानली जात आहे. MPSC सारख्या कठीण परीक्षेत टॉपर होऊन शासकीय सेवेत रुजू झालेल्या अधिकाऱ्याकडून अशी लाचखोरी समोर आल्याने स्पर्धात्मक परीक्षांमधून निवड झालेल्या युवा अधिकाऱ्यांच्या नैतिकतेवर आणि मूल्यांवर गंभीर प्रश्न उपस्थित झाला आहे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगाच्या २०१६ च्या (MPSC 2016) परीक्षेत अनुसूचित जमाती प्रवर्गात राज्यात प्रथम क्रमांकाने उत्तीर्ण (Passed with the first rank in the state) झालेल्या श्रीनिवास लखमावाड (Srinivas Lakhmawad) या अधिकाऱ्याला लाच घेताना लाचलुचपत प्रतिबंधक विभागाने (ACB) रंगेहात पकडले आहे. सामाजिक वनीकरण विभागात कार्यरत असलेल्या या अधिकाऱ्याने वृक्षलागवडीच्या बिलांसह कर्मचाऱ्यांच्या वेतन आणि निलंबन मागे घेण्यासाठी ४५ लाख रुपयांची लाच (Bribe of Rs 45 lakh) मागितली होती. बीड जिल्ह्यात पालकमंत्री सुनेत्रा पवार यांच्या दौऱ्याच्या दिवशीच ही धक्कादायक घटना घडली.
शैक्षणिक क्षेत्रात ही घटना मोठी चिंतेची बाब मानली जात आहे. एमपीएससीसारख्या कठीण परीक्षेत टॉपर होऊन शासकीय सेवेत रुजू झालेल्या अधिकाऱ्याकडून अशी लाचखोरी समोर आल्याने स्पर्धात्मक परीक्षांमधून निवड झालेल्या युवा अधिकाऱ्यांच्या नैतिकतेवर आणि मूल्यांवर गंभीर प्रश्न उपस्थित झाला आहे. बी.टेक. इंजिनिअर असलेल्या लखमावाड यांनी यशस्वी होण्यासाठी कष्ट, सातत्य आणि स्वतःवर विश्वास ठेवण्याचे महत्त्व सांगितले होते. मात्र, आज त्यांच्याच कृत्यामुळे शैक्षणिक गुणवत्ता आणि निष्ठेचे उदाहरण धुळीस मिळाले आहे.
या प्रकारामुळे शासकीय सेवेतील पारदर्शकता आणि नैतिकता वाढवण्याची गरज पुन्हा एकदा अधोरेखित झाली आहे. एमपीएससीसारख्या परीक्षांमधून निवड झालेल्या प्रतिभावान युवकांना नैतिक शिक्षण आणि मूल्यशिक्षण देण्यावर अधिक भर देणे आवश्यक आहे. शैक्षणिक संस्थांमधून केवळ ज्ञान नव्हे तर चारित्र्य आणि निष्ठेचे संस्कार घडवणे हे आजचे मोठे आव्हान ठरले आहे.
लाचलुचपत प्रतिबंधक विभागाने केलेल्या या कारवाईमुळे प्रशासनात खळबळ उडाली असून, शैक्षणिक आणि स्पर्धात्मक परीक्षांमधील गुणवत्ता व नैतिकतेचा मुद्दा पुन्हा चर्चेत आला आहे. या घटनेमुळे उज्ज्वल भविष्य घडवणाऱ्या युवा पिढीसमोर एक चेतावणी म्हणूनही पाहिले जात आहे.
