सिम्बायोसिस इंटरनॅशनल युनिव्हर्सिटीच्या कुलपतीपदी डॉ. विद्या येरवडेकर यांची नियुक्ती

एज्युवार्ता न्यूज नेटवर्क 

 सिम्बायोसिस इंटरनॅशनल (डीम्ड टू बी युनिव्हर्सिटी)च्या कुलपतीपदी डॉ. विद्या येर्वडेकर यांची नियुक्ती करण्यात आली आहे. या नियुक्तीबद्दल त्यांनी कृतज्ञता व्यक्त करत, ही जबाबदारी अत्यंत नम्रतेने आणि दृढ उद्देशाने स्वीकारत असल्याचे सांगितले आहे. सोशल मीडियावर त्यांनी याबाबतची माहिती दिली आहे.

डॉ. विद्या येर्वडेकर यांनी सांगितले की, सिम्बायोसिसच्या कुलपती पदाची जबाबदारी स्वीकारणे हा त्यांच्या आयुष्यातील सर्वोच्च सन्मान आहे. ही केवळ नियुक्ती नसून, गेली पाच दशके सिम्बायोसिसला दिशा देणाऱ्या मूल्यांचा आणि दूरदृष्टीचा वारसा पुढे नेण्याची जबाबदारी आहे.

विद्या येरवडेकर यांनी सिंबायोसिसचे संस्थापक प्रा. डॉ. एस. बी. मुजुमदार यांच्या कार्याचा गौरव करत सांगितले की, त्यांनी केवळ एक शैक्षणिक संस्था उभारली नाही, तर 'वसुधैव कुटुंबकम्' या भारतीय तत्त्वज्ञानावर आधारित करुणा, सर्वसमावेशकता आणि जागतिक बंधुभावाची चळवळ उभी केली. त्यांचे विचार आणि कार्य सिम्बायोसिसच्या वाटचालीला प्रेरणा देत आहेत.

गेल्या अनेक दशकांपासून सिंबायोसिसचे संस्थापक मुजुमदार यांच्यासोबत काम करण्याची संधी लाभल्याचे नमूद करत त्यांनी सांगितले की, नेतृत्व म्हणजे सेवा, प्रामाणिकपणा आणि विद्यार्थ्यांना प्रत्येक निर्णयाच्या केंद्रस्थानी ठेवणे, हा महत्त्वाचा धडा त्यांनी त्यांच्याकडून शिकला.

नवीन जबाबदारी स्वीकारताना सिम्बायोसिसची मूल्यपरंपरा जपत बदलत्या जागतिक परिस्थितीनुसार संस्थेला अधिक सक्षम, सामाजिकदृष्ट्या जबाबदार आणि भविष्याभिमुख बनविण्यासाठी कार्यरत राहणार असल्याचे त्यांनी स्पष्ट केले. यासाठी प्राध्यापक, कर्मचारी, विद्यार्थी, माजी विद्यार्थी आणि जगभरातील सहकाऱ्यांच्या सहकार्याने सिम्बायोसिसला जागतिक स्तरावर अधिक प्रतिष्ठित बनविण्याचा संकल्प त्यांनी व्यक्त केला.

सिंबायोसिसचे संस्थापक प्रा. (डॉ.) एस. बी. मुजुमदार यांच्याप्रती मनःपूर्वक कृतज्ञता व्यक्त करत, कोणत्याही संस्थेची खरी ताकद तिच्या मूल्यांमध्ये आणि माणसांमध्ये असते, हा अमूल्य वारसा जपण्याचा आपण सातत्याने प्रयत्न करू, असे येरवडेकर यांनी सांगितले.