विशेष गरजा असलेल्या विद्यार्थ्यांविषयी संवेदनशीलता वाढविण्यावर भर
विद्यार्थ्यांच्या शैक्षणिक, भावनिक आणि सामाजिक विकासासाठी योग्य दृष्टिकोन, आवश्यक सहाय्याच्या पद्धती आणि त्यांच्याशी संवेदनशीलतेने संवाद साधण्याचे महत्त्व याविषयी त्यांनी माहिती दिली.
Eduvarta
एज्युवार्ता न्यूज नेटवर्क
प्रियदर्शनी स्कूल, मोशी येथे ‘Understanding Special Education’ (विशेष शिक्षण समजून घेणे) या विषयावर मार्गदर्शन व जनजागृतीपर सत्राचे आयोजन करण्यात आले. विशेष गरजा असलेल्या विद्यार्थ्यांविषयी शालेय समुदायामध्ये जागरूकता, संवेदनशीलता आणि समावेशकतेची भावना निर्माण करणे हा या सत्राचा प्रमुख उद्देश होता.
अंजली मॉरिस फाउंडेशनच्या Ms. Medha यांनी या सत्रादरम्यान विशेष शैक्षणिक सहाय्याची गरज असलेल्या विद्यार्थ्यांच्या विविध शिकण्याच्या गरजा, त्यांच्यासमोरील आव्हाने तसेच त्यांच्या वैयक्तिक क्षमता आणि गरजा याबाबत मार्गदर्शन केले. विद्यार्थ्यांच्या शैक्षणिक, भावनिक आणि सामाजिक विकासासाठी योग्य दृष्टिकोन, आवश्यक सहाय्याच्या पद्धती आणि त्यांच्याशी संवेदनशीलतेने संवाद साधण्याचे महत्त्व याविषयी त्यांनी माहिती दिली.
प्रत्येक विद्यार्थ्याची शिकण्याची पद्धत आणि क्षमता वेगळी असते. त्यामुळे विद्यार्थ्यांना समजून घेणे, त्यांचा आदर करणे आणि त्यांच्या क्षमतेनुसार शिकण्याची व प्रगती करण्याची समान संधी उपलब्ध करून देणे आवश्यक असल्याचे यावेळी अधोरेखित करण्यात आले.
प्रियदर्शनी स्कूलकडून विद्यार्थीकेंद्रित आणि सर्वसमावेशक शिक्षणाला प्राधान्य देत विविध उपक्रम सातत्याने राबविण्यात येत आहेत. या मार्गदर्शन सत्रामुळे शिक्षक व शालेय समुदायामध्ये विशेष गरजा असलेल्या विद्यार्थ्यांकडे अधिक संवेदनशील आणि सकारात्मक दृष्टिकोनातून पाहण्यास मदत झाली.
समावेशक, संवेदनशील आणि विद्यार्थ्यांच्या सर्वांगीण विकासाला पोषक शैक्षणिक वातावरण निर्माण करण्याच्या शाळेच्या प्रयत्नांना या उपक्रमामुळे अधिक बळ मिळाले.
