MPSC Exam : आजच्या परीक्षेने केले दोन विक्रम; आयोगाच्या इतिहासात पहिल्यांदाच...
परीक्षेकरिता एकूण ४,६७,०८५ उमेदवारांना प्रवेश देण्यात आला होता. त्यांच्या बैठक व्यवस्थेकरिता राज्यातील ३७ जिल्हा केंद्रावरील एकूण १,४७५ परीक्षा उपकेंद्रे निश्चित करण्यात आली होती.
eduvarta@gmail.com 
एज्युवार्ता न्यूज नेटवर्क
महाराष्ट्र लोकसेवा आयोगाच्या (MPSC Examination) इतिहासातील सर्वात मोठी भरती प्रक्रियेतील संयुक्त पूर्व परीक्षा रविवारी सुरळीत पार पडल्याचे आयोगाने म्हटले आहे. या परीक्षमुळे आयोगाने दोन विक्रम केले आहेत. पहिल्यांदाच सर्वाधिक पदांची भरती आणि त्यासाठी विद्यार्थ्यांनी (Students) केलेल्या अर्जांची संख्याही सर्वाधिक होती. (Combined Pre-Examination in the largest recruitment process in the history of MPSC)
आयोगामार्फत रविवारी महाराष्ट्र अराजपत्रित गट ब, गट क सेवा संयुक्त पूर्व परीक्षा २०२३ आयोजित करण्यात आली. या परीक्षेसाठी एकूण ४ लाख ६७ हजार ८५ उमेदवारांना प्रवेश देण्यात आला होता. त्यांच्या बैठक व्यवस्थेकरिता राज्यातील ३७ जिल्हा केंद्रावरील एकूण १ हजार ४७५ परीक्षा उपकेंद्रे निश्चित करण्यात आली होती. या पूर्व परीक्षेकरिता साधारणपणे ८० टक्के उपस्थिती असल्याचे दिसून आले असून परीक्षा सुरळीतपणे पार पाडण्यात आल्याची माहिती आयोगाकडून देण्यात आली.
हेही वाचा : अंगणवाडी कर्मचाऱ्यांच्या भरतीत ICDS आयुक्तांकडून आडकाठी?
संयुक्त पूर्व परीक्षा २०२३ परीक्षेमधून राज्य शासनाच्या विविध विभागातील एकूण ८ हजार १६९ पदे भरली जाणार आहेत. आयोगामार्फत आतापर्यंतची ही सर्वात मोठी भरती ठरली आहे. अर्ज सादर करणाऱ्या उमेदवारांची संख्या देखील आयोगाच्या इतिहासातील सर्वोच्च संख्या आहे. त्यामुळे या परीक्षेमुळे आयोगाच्या इतिहासात दोन विक्रमांची नोंद झाली आहे.
दरम्यान, काही दिवसांपूर्वी या परीक्षेची हॉल तिकीट एका टेलिग्राम चॅनेलवर व्हायरल झाली होती. जवळपास लाखभर विद्यार्थ्यांची प्रवेशपत्र लिक झाल्याने खळबळ उडाली होती. आयोगानेही प्रवेशपत्र लिक झाल्याची कबुली देत संबंधित चॅनेलवर गुन्हाही दाखल केला आहे. याबाबतची चौकशी पोलिसांनी सुरू केली आहे. विद्यार्थ्यांची इतर वैयक्तिक माहिती तसेच प्रश्नपत्रिका लिक झाली नसल्याचे आयोगाकडून स्पष्ट करण्यात आले होते. यापार्श्वभूमीवर रविवारी ही परीक्षा सुरळीतपणे पार पडली.
