MHT-CET : मुख्यमंत्र्यांकडून परीक्षा केंद्रांचे फॉरेन्सिक ऑडिट आणि FIR नोंदवण्याचे आदेश
विद्यार्थी आणि शिक्षकांची भेट घेतल्यानंतर, महाराष्ट्रचे मुख्यमंत्री देवेंद्र फडणवीस यांनी MHT-CET मधील अनियमिततेप्रकरणी फॉरेन्सिक ऑडिट आणि एफआयआर दाखल करण्याचे आदेश दिले आहेत. या चौकशीबाबतची सविस्तर माहिती.
Eduvarta
एज्युवार्ता न्यूज नेटवर्क
महाराष्ट्रातील महत्त्वाच्या MHT-CET परीक्षेतील कथित अनियमितता आणि विविध तक्रारींबाबत मुख्यमंत्री देवेंद्र फडणवीस यांनी गंभीर दखल घेतली आहे. राज्यभरातील शिक्षक व विद्यार्थ्यांच्या एका शिष्टमंडळाने मुंबईत त्यांची भेट घेतली. यावेळी त्यांनी परीक्षेतील अडचणी, पर्सेंटाइलबाबतच्या तक्रारी आणि इतर मुद्दे स्पष्टपणे मांडले. मुख्यमंत्र्यांनी सर्व मुद्दे बारकाईने ऐकून घेतले आणि लगेचच कठोर कारवाईचे आदेश दिले. यामुळे विद्यार्थी व पालकांमध्ये निर्माण झालेली अस्वस्थता दूर होण्यास मदत होईल, अशी अपेक्षा व्यक्त केली जात आहे.
ज्या परीक्षा केंद्रांविरुद्ध तक्रारी आल्या आहेत, त्या सर्व केंद्रांचे फॉरेन्सिक ऑडिट करण्याचे मुख्यमंत्र्यांनी स्पष्ट निर्देश दिले. शिक्षकांनी दाखल केलेल्या तक्रारींनुसार पोलीस एफआयआर नोंदवतील आणि या प्रकरणाचा तपास सह-पोलीस आयुक्त दर्जाच्या वरिष्ठ अधिकाऱ्यांकडून केला जाईल. तसेच, परीक्षेसंबंधी डेटा लीक झाल्याच्या आरोपांचीही फॉरेन्सिक तपासणी करण्यात येईल. या संपूर्ण तपासावर सह-पोलीस आयुक्तांचे पर्यवेक्षण राहील. दोषी आढळणाऱ्या कोणाचीही गय न करता त्यांच्यावर कठोर कायदेशीर कारवाई केली जाईल, असा इशाराही मुख्यमंत्र्यांनी दिला.
या प्रकरणाचे गांभीर्य लक्षात घेऊन तपास त्वरित सुरू व्हावा यासाठी मुंबई पोलीस आयुक्तांना आवश्यक ते सर्व आदेश तातडीने देण्यात आले आहेत. गेल्या महिनाभरापासून विद्यार्थी आणि पालक MHT-CET मधील कथित घोळाबाबत आवाज उठवत आहेत. पर्सेंटाइल गणना आणि डेटा लीक प्रकरणात तत्काळ कारवाईची मागणी केली जात होती. याच पार्श्वभूमीवर शिष्टमंडळाने मुख्यमंत्र्यांची भेट घेतली आणि आपल्या तक्रारी थेट मांडल्या.
याशिवाय, परीक्षा ऑनलाइन पद्धतीने न घेता पूर्वीप्रमाणे ऑफलाइन घेण्याचीही मागणी यावेळी करण्यात आली. मुख्यमंत्र्यांच्या या निर्णयामुळे संपूर्ण प्रक्रिया अधिक पारदर्शक आणि विश्वासार्ह होईल, असा विश्वास व्यक्त केला जात आहे. सरकारने या प्रकरणात कोणत्याही प्रकारची दिरंगाई न करता कठोर पावले उचलल्याचे दिसून येत आहे. विद्यार्थी आणि शिक्षक समुदायाला यामुळे दिलासा मिळाला आहे.
ज्या परीक्षा केंद्रांवर तक्रारी प्राप्त झाल्या आहेत, त्या केंद्रांचे फॉरेन्सिक ऑडिट केले जाईल. शिक्षकांनी केलेल्या सर्व तक्रारींवर एफआयआर दाखल केले जातील आणि पोलीस सहआयुक्तांमार्फत त्यांची चौकशी केली जाईल. याव्यतिरिक्त, डेटा लीकच्या तक्रारींचीही फॉरेन्सिक चौकशी केली जाईल.
- विक्रम पाचपुते, आमदार
