लष्कराचे 'टेररिझम टू टूरिझम' या थीमवर काम सुरू  

एज्युवार्ता न्यूज नेटवर्क 

नागरिकांना युद्धभूमीचा अनुभव घेता यावा, या उद्देशाने भारतीय लष्कर सियाचीन आणि गलवानची युद्धभूमी पर्यटकांसाठी खुली करणार आहे.तसेच भारतीय सैन्याने जम्मू आणि काश्मीरमध्ये "टेरिझम टू टूरिझम" (terrorism to tourism) या थीमवर सक्षमपणे काम करण्यास सुरूवात केली आहे, असे प्रतिपादन भारताचे लष्करप्रमुख जनरल उपेंद्र द्विवेदी (PVSM,AVSM) (Army Chief General Upendra Dwivedi)यांनी केले.

सावित्रीबाई फुले पुणे विद्यापीठाच्या डिफेन्स अँड स्ट्रॅटेजिक स्टडीज विभागाच्या वतीने आयोजित जनरल बी.सी.जोशी मेमोरियल लेक्चरमध्ये 'रोल अँड कॉन्ट्रीब्युशन ऑफ इंडियन आर्मी इन सेक्युरिंग इंडियाज ग्रोथ स्टोरी' या विषयावर मार्गदर्शन करताना भारताचे लष्करप्रमुख जनरल उपेंद्र द्विवेदी (PVSM,AVSM) बोलत होते. यावेळी सावित्रीबाई फुले पुणे विद्यापीठाचे कुलगुरू डॉ.सुरेश गोसावी, प्र-कुलगुरू डॉ.पराग काळकर, प्रभारी कुलसचिव डॉ.ज्योती भाकरे, डिफेन्स अँड स्ट्रॅटेजिक स्टडीज विभागाचे प्रमुख डॉ.विजय खरे आदी उपस्थित होते.

उपेंद्र द्विवेदी म्हणाले, पर्यटनाला चालना देण्यासाठी ४८ क्षेत्रे निश्चित करण्यात आली असून येत्या पाच वर्षांत पर्यटकांची संख्या दुप्पट करण्याचे उद्दिष्ट ठेवण्यात आले आहे. गिर्यारोहण आणि संबंधित उपक्रमांमध्ये स्थानिक लोकांचे कौशल्य वाढवणे हा आमच्या प्रशिक्षण कार्यक्रमाचा एक भाग आहे.ट्रान्स-हिमालय ट्रेक, उत्तराखंडमधील सोल ऑफ स्टील ट्रेक आणि सियाचीन ग्लेशियरचा ट्रेक सर्व नागरिकांसाठी खुला आहे.

कार्यक्रमाचे प्रास्ताविक डॉ.विजय खरे यांनी केले.कुलगुरू डॉ.सुरेश गोसावी यांनी उपेंद्र द्विवेदी यांचा परिचय करून दिला.प्र-कुलगुरू डॉ. पराग काळकर यांनी आभार मानले.तर सूत्रसंचालन भारती कोकिळ यांनी केले.