NEET सह मनीषा मांढरे यांनी इतरही प्रश्नपत्रिका सेट केल्या; त्याचीही चौकशी होणार ?
नॅशनल स्टुडंट्स युनियन ऑफ इंडिया (NSUI) ने बुधवारी 20 मे 2026 रोजी पुणे शहर पोलीस आयुक्तांना निवेदन देत NEET पेपरफुटी प्रकरणाची व्याप्ती वाढवून सखोल चौकशी करण्याची मागणी केली असल्याचे निवेदन अक्षय कांबळे यांनी पोलिसांना दिले.
eduvarta@gmail.com 
एज्युवार्ता न्यूज नेटवर्क
नीट पेपर फुटी प्रकरणी सीबीआयने अटक केलेल्या पुण्यातील प्राध्यापिका मनीषा मांढरे यांनी केवळ नीटच्या प्रश्नपत्रिका सेट केल्या नाहीत तर महाराष्ट्र राज्य माध्यमिक व उच्च माध्यमिक शिक्षण मंडळाच्या म्हणजेच बोर्डाच्या आणि सीईटी सेलच्या प्रश्नपत्रिका सुद्धा सेट केल्या होत्या,अशी माहिती समोर आली आहे.त्यामुळे मांढरे यांनी केवळ नीटच्या प्रश्नपत्रिका फोडल्या होत्या की बोर्डाच्या आणि सीईटी सेलच्या सुद्धा प्रश्नपत्रिका तोडल्या होत्या, याचीही चौकशी होणे आवश्यक असल्याचे बोलले जात आहे.दरम्यान, याबाबत नॅशनल स्टुडंट्स युनियन ऑफ इंडिया(एनएसयूआय)तर्फे पुणे पोलिसांना याबाबतचे निवेदन देण्यात आले आहे.
सीबीआयच्या तपासात मांढरे यांच्या निवासस्थानी विशेष कोचिंग क्लासेस आयोजित करण्यात आले होते. या वर्गांमध्ये बॉटनी आणि झूलॉजी विषयातील अनेक प्रश्न विद्यार्थ्यांना सांगण्यात आले, त्यांची चर्चा करण्यात आली तसेच विद्यार्थ्यांना ते प्रश्न वहीत लिहून ठेवण्यास आणि पुस्तकांमध्ये मार्क करण्याच्या सूचना देण्यात आल्या होत्या. त्यामुळे मांढरे या विद्यार्थ्यांना होणाऱ्या परीक्षेचे प्रश्न पुरवत असल्याचे समोर येते.
मनीषा मांढरे या अनुभवी प्राध्यापक आहेत. त्यामुळेच त्यांना एनटीए ने पेपर सेटिंगच्या पॅनेलवर घेतले होते.परंतु, मांढरे यांना राज्य मंडळाच्या प्रश्नपत्रिका सेट करण्यासाठी नियुक्त केले जात होते. त्यामुळे या तपासाची व्याप्ती वाढवून त्याचीही चौकशी करावी,अशी मागणी एनएसयूआयतर्फे करण्यात आली आहे.
नॅशनल स्टुडंट्स युनियन ऑफ इंडिया (NSUI) ने बुधवारी 20 मे 2026 रोजी पुणे शहर पोलीस आयुक्तांना निवेदन देत NEET पेपरफुटी प्रकरणाची व्याप्ती वाढवून सखोल चौकशी करण्याची मागणी केली असल्याचे निवेदन अक्षय कांबळे यांनी पोलिसांना दिले.
मॉडर्न कॉलेजच्या प्राध्यापिका प्रा. मनीषा मांढरे या NEET पेपरफुटी प्रकरणात आरोपी असून, त्या यापूर्वी महाराष्ट्र बोर्डाच्या बारावीच्या परीक्षा तसेच MH-CET परीक्षेच्या प्रश्नपत्रिका तयार करण्याच्या प्रक्रियेतही सहभागी असल्याची माहिती समोर आली आहे. त्या अनुषंगाने बारावीच्या बोर्डाच्या परीक्षा व MH-CET परीक्षा संदर्भात देखील कोणत्याही प्रकारचा गैरप्रकार किंवा पेपर लीक झाला आहे का ? याची निष्पक्ष व सखोल चौकशी होणे अत्यंत आवश्यक असल्याची मागणी NSUI तर्फे करण्यात आली आहे.
