मोटेगावकरांचे RCC कोचिंग CBI च्या रडारवर; यशस्वी विद्यार्थीही चौकशीच्या फेऱ्यात?
आरसीसी लातूरची महाराष्ट्रातील आघाडीची NEET-JEE कोचिंग संस्था मानली जाते. तिच्या राज्यभरात एकूण ९ शाखा आहेत. २०२५ च्या नीट परीक्षेत आरसीसीमधील २१ विद्यार्थ्यांची निवड झाली होती.
eduvarta@gmail.com 
एज्युवार्ता न्यूज नेटवर्क
नीट-युजी २०२६ (NEET-UG 2026) पेपर फुटी प्रकरणाने (NEET Paper Leak Case) संपूर्ण देशात खळबळ माजवली आहे. या प्रकरणात सीबीआयच्या तपासात महाराष्ट्रातील प्रसिद्ध कोचिंग संचालक शिवराज मोटेगावकर (Shivraj Motegaonkar) यांची अटक झाल्यानंतर आता त्यांच्या रेणुकाई केमिस्ट्री क्लासेस (RCC) संस्थेवर मोठा संशय व्यक्त होत आहे. तपास अन्वेषण ब्युरोने (CBI) आरसीसी संस्थेच्या जुन्या नोंदी, यशस्वी विद्यार्थ्यांच्या गुणवत्ता आणि रँकची सखोल तपासणी सुरू केली आहे.
आरसीसी लातूरची महाराष्ट्रातील आघाडीची NEET-JEE कोचिंग संस्था मानली जाते. तिच्या राज्यभरात एकूण ९ शाखा आहेत. २०२५ च्या नीट परीक्षेत आरसीसीमधील २१ विद्यार्थ्यांची निवड झाली होती. यातील १९ विद्यार्थ्यांना देशातील प्रतिष्ठित AIIMS संस्थांमध्ये तर २ विद्यार्थ्यांना मुंबईतील केईएम हॉस्पिटलमध्ये प्रवेश मिळाला होता. या यशस्वी विद्यार्थ्यांच्या यशामुळे सीबीआयचा संशय अधिक गडद झाला आहे. सीबीआय आता या २१ विद्यार्थ्यांची, त्यांच्या पालकांची आणि संस्थेच्या जुन्या विद्यार्थ्यांचीही चौकशी करणार आहे.
मोटेगावकर २०२५ पूर्वीही नीटच्या प्रश्नपत्रिका मिळवत होते का, याचा शोध घेतला जात आहे. मागील चार ते पाच वर्षांतील आरसीसीमधून उत्तीर्ण झालेल्या विद्यार्थ्यांच्या नोंदी, गुण, रँक आणि प्रवेश यांची तपासणी केली जाणार आहे. संस्थेने आपल्या यशस्वी विद्यार्थ्यांच्या स्कोअरचा मोठ्या प्रमाणात मार्केटिंगसाठी वापर केला होता. आता हे यश कठोर मेहनतीचे होते की पेपर फुटीच्या साहाय्याने मिळवले गेले, याचा सीबीआय सखोल तपास करत आहे.
मोटेगावकर यांना १८ मे रोजी अटक करण्यात आली. त्यांच्या मोबाईलमध्ये परीक्षेच्या १० दिवस आधी म्हणजे २३ एप्रिल रोज लीक झालेला केमिस्ट्री पेपर आणि उत्तरकी सापडली. सीबीआयने त्यांना ९ दिवसांची कोठडी दिली आहे. या प्रकरणात मोटेगावकरांच्या मुलाची देखील सक्रिय चौकशी सुरू आहे. मुलगा यावर्षी नीट परीक्षेला बसला होता. लातूरचे प्रसिद्ध रसायनशास्त्राचे नामवंत प्राध्यापक म्हणून ओळखले जाणारे मोटेगावकर आता सीबीआयच्या अटकेत आहेत. त्यांच्या अटकेने महाराष्ट्राच्या शैक्षणिक वर्तुळात मोठी खळबळ उडाली आहे. सीबीआयने आरसीसी संस्थेच्या कार्यालयात झडती घेतली असून, आणखी अटका आणि खुलासे होण्याची शक्यता वर्तवली जात आहे.
