नीट परीक्षा वर्षातून दोनदा होण्याची शक्यता; नंदन नीलेकणी यांचा टास्क फोर्ससमोर सुधारणा प्रस्ताव
मेडिकल क्षेत्रात करिअर घडवण्याचे स्वप्न पाहणाऱ्या लाखो विद्यार्थ्यांसाठी आश्वासक बातमी समोर येत आहे. नंदन नीलेकणी यांच्या नेतृत्वाखालील उच्च अधिकारप्राप्त टास्क फोर्ससमोर नीट-यूजी परीक्षेच्या सध्याच्या पद्धतीत मोठे बदल करण्यासाठी अनेक महत्त्वाचे प्रस्ताव सादर झाले आहेत.
एज्युवार्ता न्यूज नेटवर्क
मेडिकल क्षेत्रात करिअर घडवण्याचे स्वप्न पाहणाऱ्या लाखो विद्यार्थ्यांसाठी आश्वासक बातमी समोर येत आहे. नंदन नीलेकणी यांच्या नेतृत्वाखालील उच्च अधिकारप्राप्त टास्क फोर्ससमोर नीट-यूजी परीक्षेच्या सध्याच्या पद्धतीत मोठे बदल करण्यासाठी अनेक महत्त्वाचे प्रस्ताव सादर झाले आहेत. सध्या मेडिकल प्रवेश पूर्णपणे एकाच सामायिक प्रवेश परीक्षेवर अवलंबून असल्याने विद्यार्थ्यांचा कल शाळेच्या नियमित अभ्यासक्रमापेक्षा कोचिंग क्लासेसकडे वाढला आहे. यामुळे शिक्षणाच्या गुणवत्तेवर परिणाम होत असल्याची चिंता व्यक्त केली जात आहे.
सध्याच्या व्यवस्थेमुळे अनेक विद्यार्थी दहावीनंतर डमी शाळांमध्ये प्रवेश घेऊन संपूर्ण वेळ कोचिंगवर लक्ष केंद्रित करतात. परिणामी नियमित शाळेचे शिक्षण मागे पडत आहे. या समस्येवर उपाय म्हणून अनेक राज्यांनी बारावी बोर्ड परीक्षेच्या गुणांना नीट स्कोअरमध्ये काही प्रमाणात वेटेज देण्याची जोरदार मागणी केली आहे. असे झाल्यास विद्यार्थ्यांना शाळेच्या अभ्यासक्रमाकडे अधिक गांभीर्याने पाहणे भाग पडेल. मात्र बोर्डाच्या गुणांना नेमके किती प्रमाणात महत्त्व दिले जाईल, याबाबत अद्याप अंतिम निर्णय झालेला नाही.

परीक्षेच्या स्वरूपातही बदल अपेक्षित आहेत. पारंपरिक पेन-पेपर पद्धतीऐवजी संगणकाधारित परीक्षा (सीबीटी) घेण्याबाबत चर्चा सुरू आहे. विद्यार्थ्यांना अचानक अडचण येऊ नये म्हणून सुरुवातीच्या काळात ऑनलाइन आणि ऑफलाइन दोन्ही पर्याय उपलब्ध करून दिले जाऊ शकतात. त्यानंतर हळूहळू परीक्षा पूर्णपणे ऑनलाइन पद्धतीकडे वळवली जाऊ शकते. तसेच एकाच प्रयत्नात अपयश आल्यास विद्यार्थ्यांवर होणारा ताण कमी करण्यासाठी नीट परीक्षा वर्षातून एकापेक्षा जास्त वेळा घेण्याचा प्रस्तावही मांडण्यात आला आहे.
विद्यार्थ्यांची गैरसोय टाळण्यासाठी देशातील प्रत्येक जिल्ह्यात किमान एक परीक्षा केंद्र असावे, अशीही मागणी करण्यात आली आहे. यामुळे दूरवर प्रवास करण्याची गरज राहणार नाही. तामिळनाडूने राज्य मंडळाच्या विद्यार्थ्यांच्या हिताचा मुद्दा उपस्थित करत नीट लागू झाल्यानंतर सीबीएसई आणि आयसीएसईच्या तुलनेत राज्य बोर्डाच्या विद्यार्थ्यांचे प्रमाण घटल्याची चिंता व्यक्त केली आहे. या सर्व प्रस्तावांवर विचार करून आरोग्य मंत्रालयाकडून भविष्यात नीटच्या अंतिम स्वरूपाबाबत निर्णय घेतला जाण्याची शक्यता आहे.