महाराष्ट्र गट-क सेवा पूर्व परीक्षेत पदसंख्या वाढून १६ हजार ७१७ झाली; परीक्षा तारीखही बदलली
महाराष्ट्र लोकसेवा आयोगामार्फत होणाऱ्या महाराष्ट्र गट-क सेवा संयुक्त पूर्व परीक्षा २०२६ मधील पदसंख्येत मोठी वाढ करण्यात आली आहे. यापूर्वी पाच हजार सातशे सात पदांसाठी जाहीर झालेल्या या परीक्षेत आता आणखी अकरा हजार दहा पदांचा समावेश करण्यात आला आहे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगामार्फत होणाऱ्या महाराष्ट्र गट-क सेवा संयुक्त पूर्व परीक्षा २०२६ मधील पदसंख्येत मोठी वाढ करण्यात आली आहे. यापूर्वी पाच हजार सातशे सात पदांसाठी जाहीर झालेल्या या परीक्षेत आता आणखी अकरा हजार दहा पदांचा समावेश करण्यात आला आहे. त्यामुळे एकूण पदसंख्या सोळा हजार सातशे सतरा झाली आहे. यासंदर्भातील शुद्धिपत्रक आयोगाच्या अधिकृत संकेतस्थळावर प्रसिद्ध करण्यात आले आहे. राज्यातील भरती प्रक्रिया अधिक पारदर्शक आणि सुरक्षित करण्यासाठी स्थापन केलेल्या उच्चस्तरीय समितीच्या अंतरिम अहवालातील शिफारशींच्या अनुषंगाने हा निर्णय घेण्यात आला आहे. आयोगाला प्राप्त झालेल्या अतिरिक्त मागणीपत्रांनुसार पदसंख्येत ही वाढ करण्यात आली आहे.
यापूर्वी पंचवीस जून २०२६ रोजी दोन हजार सहाशे एकोणीस पदांची जाहिरात प्रसिद्ध झाली होती. त्यानंतर बावीस जुलै २०२६ च्या शुद्धिपत्रकाद्वारे आणखी तीन हजार अठ्ठ्याऐंशी पदे जोडली गेली आणि पदसंख्या पाच हजार सातशे सात झाली होती. आता नव्याने अकरा हजार दहा पदांचा समावेश झाल्याने एकूण सोळा हजार सातशे सतरा पदे भरली जाणार आहेत. सामान्य प्रशासन विभागाच्या पाच नोव्हेंबर २०२६ रोजीच्या शासन निर्णयानुसार शासन सेवेत प्रवेशासाठी विहित कमाल वयोमर्यादेत एक वर्षाची शिथिलता देण्यात आली आहे. या निर्णयाचा लाभ या परीक्षेसाठी पात्र उमेदवारांनाही मिळणार आहे.
वाढीव पदसंख्येच्या अनुषंगाने उमेदवारांना नव्याने अर्ज सादर करण्याची संधी देण्यात येणार आहे. यापूर्वी अर्ज केलेल्या आणि शैक्षणिक अर्हतेनुसार नव्याने समाविष्ट झालेल्या एकापेक्षा अधिक संवर्गांसाठी पात्र असलेल्या उमेदवारांना विकल्प सादर करता येणार आहेत. त्यासाठी नव्याने अर्ज करण्याची गरज नाही. नव्याने अर्ज तसेच विकल्प सादर करण्यासाठी तेरा ते सत्तावीस नोव्हेंबर २०२६ या कालावधीत आयोगाच्या संकेतस्थळावर लिंक उपलब्ध करून देण्यात येणार आहे.
विद्यमान तसेच नव्याने समाविष्ट झालेल्या संवर्गांसाठी एकच संयुक्त पूर्व परीक्षा घेण्यात येणार आहे. ही परीक्षा ऑफलाइन पद्धतीने आयोजित केली जाईल. आयोगाच्या संकेतस्थळावर पंधरा नोव्हेंबर २०२२ रोजी प्रसिद्ध करण्यात आलेला अभ्यासक्रम या परीक्षेसाठी लागू राहणार आहे. सामान्य शैक्षणिक अर्हता आवश्यक असलेल्या गट-क सेवेतील प्रशासकीय संवर्गांच्या मुख्य परीक्षेचे आयोजन विहित परीक्षा योजना व अभ्यासक्रमानुसार करण्यात येणार आहे.
विशिष्ट शैक्षणिक अर्हता आवश्यक असलेल्या तसेच नव्याने समाविष्ट झालेल्या संवर्गांसाठी स्वतंत्र मुख्य परीक्षा घेण्यात येणार आहे. संबंधित संवर्गांचा अभ्यासक्रम प्राधान्याने तयार करून आयोगाच्या संकेतस्थळावर लवकरच प्रसिद्ध करण्यात येणार आहे. वाढीव पदसंख्येमुळे नव्याने अर्ज स्वीकारणे आणि यापूर्वी अर्ज केलेल्या पात्र उमेदवारांकडून विकल्प घेण्यासाठी पुरेसा कालावधी देणे आवश्यक असल्याने परीक्षा तारखेत बदल करण्यात आला आहे.
यापूर्वी तीन जानेवारी २०२७ रोजी नियोजित असलेली ही परीक्षा आता चौवीस जानेवारी २०२७ रोजी घेण्यात येणार आहे. पदसंख्येतील वाढ आणि परीक्षा योजनेतील बदलासंदर्भातील शुद्धिपत्रके आयोगाच्या अधिकृत संकेतस्थळावर प्रसिद्ध करण्यात आली आहेत. उमेदवारांनी या शुद्धिपत्रकांचे अवलोकन करून त्यानुसार पुढील कार्यवाही करावी, असे महाराष्ट्र लोकसेवा आयोगाने प्रसिद्धी पत्रकाद्वारे कळविले आहे.
