बायोमेट्रिकचा गैरवापर करून १९ हजार उत्तरपत्रिकांची अनधिकृत तपासणी; मुक्त विद्यापीठाच्या घोटाळ्यात ४८ जणांवर गुन्हा दाखल
छत्रपती संभाजीनगर जिल्ह्यातील लासूर स्टेशन येथील छत्रपती शाहू कला, वाणिज्य व विज्ञान महाविद्यालयातील परीक्षा मूल्यमापन केंद्रात यशवंतराव चव्हाण महाराष्ट्र मुक्त विद्यापीठाच्या उत्तरपत्रिका तपासणीमध्ये मोठा घोटाळा उघडकीस आला आहे.
एज्युवार्ता न्यूज नेटवर्क
छत्रपती संभाजीनगर जिल्ह्यातील लासूर स्टेशन येथील छत्रपती शाहू कला, वाणिज्य व विज्ञान महाविद्यालयातील परीक्षा मूल्यमापन केंद्रात यशवंतराव चव्हाण महाराष्ट्र मुक्त विद्यापीठाच्या उत्तरपत्रिका तपासणीमध्ये मोठा घोटाळा उघडकीस आला आहे. अधिकृत प्राध्यापकांच्या केवळ बायोमेट्रिक अंगठ्याचे ठसे घेऊन त्यांच्या नावाने ऑनलाइन लॉगिन तयार करण्यात आले आणि त्या माध्यमातून विषयाचे तज्ज्ञ नसलेल्या तसेच विद्यापीठाची अधिकृत नियुक्ती नसलेल्या शिक्षकांकडून तब्बल १९ हजार २३१ उत्तरपत्रिका तपासण्यात आल्या. या प्रकरणी महाविद्यालयाच्या प्राचार्यांसह एकूण ४८ जणांविरुद्ध गुन्हा दाखल करण्यात आला आहे.
विद्यापीठाचे उपकुलसचिव मनोज नारायण घंटे यांनी दिलेल्या तक्रारीनुसार हा प्रकार ९ जून ते ४ जुलै २०२५ दरम्यान घडला. विद्यापीठाने काही अधिकृत प्राध्यापकांची परीक्षक म्हणून नियुक्ती केली होती. मात्र संशयितांनी संगनमत करून त्या प्राध्यापकांचे फक्त बायोमेट्रिक ठसे घेतले आणि त्यांच्या नावाच्या बनावट लॉगिन आयडी तयार केल्या. प्रत्यक्षात संबंधित प्राध्यापक केंद्रावर उपस्थित नसतानाही तेच उत्तरपत्रिका तपासत असल्याचे चित्र निर्माण करण्यात आले. या बनावट लॉगिनचा वापर करून अनधिकृत शिक्षकांकडून मोठ्या प्रमाणात उत्तरपत्रिका तपासण्यात आल्या.

या संपूर्ण प्रक्रियेत विद्यापीठाची सुमारे २ लाख ७६ हजार ४१८ रुपयांची फसवणूक झाल्याचा आरोप आहे. तपासणीच्या कामासाठी मिळालेले मानधन अनधिकृत शिक्षकांना काही प्रमाणात वाटले गेले तर उर्वरित रकमेचा अपहार केल्याचे सांगितले जाते. संबंधित विषयांचे पुरेसे ज्ञान नसलेल्या व्यक्तींकडून उत्तरपत्रिका तपासल्याने विद्यार्थ्यांच्या निकालाच्या विश्वासार्हतेवरही प्रश्नचिन्ह निर्माण झाले आहे. विद्यापीठाच्या नियमांचे आणि कायद्याचे उल्लंघन झाल्याचे तक्रारीत स्पष्टपणे नमूद करण्यात आले आहे.
पोलिसांनी या प्रकरणी चौकशी सुरू केली असून संबंधित महाविद्यालय व मूल्यमापन केंद्रातील जबाबदार व्यक्तींची चौकशी सुरू आहे. अशा प्रकारच्या गैरप्रकारांमुळे मुक्त विद्यापीठाच्या परीक्षा व्यवस्थेवर आणि एकूणच उच्च शिक्षण व्यवस्थेच्या विश्वासार्हतेवर परिणाम होतो. विद्यार्थी व पालकांना न्याय मिळावा आणि दोषींना कठोर शिक्षा व्हावी यासाठी प्रशासनाने वेगाने कारवाई करावी, अशी मागणी विविध शिक्षण क्षेत्रातील घटकांकडून केली जात आहे.