PCMC News : मुख्याध्यापकांविना २८ शाळांचा कारभार, शिक्षकांच्या खांद्यावर ओझे

एज्युवार्ता न्यूज नेटवर्क

राज्यभरात एकीकडे शिक्षक भरती (Teachers Recruitment) कधी सुरू होणार, याबाबत उमेदवारांच्या नजरा लागलेल्या असताना शिक्षण विभागाच्या (Education Department) कारभाराच्या चिंधड्या उडत आहेत. ही बातमी पिंपरी चिंचवड महापालिकेतील (PCMC) शिक्षण विभागाच्या कारभाराची आहे. महापालिकेच्या २८ शाळा या मुख्याध्यापकांविना (Principal) सुरू असल्याचे समोर आले आहे. त्यामुळे विद्यार्थ्यांसाठीच्या (Students) विविध योजनांची अंमलबजावणी तसेच अध्यापनासह विविध कामांमध्ये अडथळे येत आहेत.

महापालिकेच्या मराठी माध्यमाच्या एकूण १०५ शाळा आहेत. पण त्यातही केवळ ९५ शाळांसाठी मुख्याध्यापकांची पदे मंजूर करण्यात आली आहेत. तर केवळ ६७ मुख्याध्यापकांची नियुक्ती करण्यात आलेली आहे. उर्वरित २८ मुख्याध्यापकांच्या जागा रिक्त आहेत. या शाळांमध्ये वरिष्ठ शिक्षकच मुख्याध्यापकांची कामे करतात. त्यामुळे त्यांच्या अध्यापनावरही परिणाम होत आहे.

विद्यार्थी, शिक्षकांसाठी ‘शरद पवार इन्सपायर फेलोशिप’; चाळीस जणांना मिळतात ६० हजार रुपये

शाळेचे मुख्याध्यापक हे सर्व प्रशासकीय कामे तसेच शिक्षकांवरील कामावर नियंत्रण ठेवण्याचे काम मुख्याध्यापक करत असतात. शाळा व महापालिकेच्या प्रशासनातील समन्वयाचे महत्वाचे कामही त्यांच्याच खांद्यावर असते. त्यामुळे प्रत्येक शाळेला मुख्याध्यापक असणे बंधनकारक आहे. पण त्यानंतर मुख्याध्यापकांची नियुक्ती करण्यात महापालिकेकडून चालढकल केली जात असल्याचा आरोप होत आहे.

शाळांमधील शिक्षकांच्या जागाही रिक्त असल्याने सध्या कार्यरत शिक्षकांवर कामाचा ताण पडत आहेत. त्यातच काही शिक्षकांना मुख्याध्यापकांची जबाबदारीही पार पाडावी लागत असल्याने विद्यार्थ्यांच्या शिक्षणावरही परिणाम होत आहे. शिक्षक भरती होत नसल्याने रिक्त जागा भरल्या जात नाहीत. त्यामुळे शिक्षण हक्क कायद्याचे तर उल्लंघन होतच आहे, पण विद्यार्थ्यांपर्यंत विविध योजना पोहचविण्यातही अडथळे येत आहेत.

दरम्यान, याविषयी माध्यमांशी बोलताना पालिकेचे सहायक आयुक्त विजयकुमार थोरात म्हणाले, मुख्याध्यापकांचे पद रिक्त असलेल्या शाळांमध्ये प्रभारी मुख्याध्यापक काम पाहत आहेत. ते चांगले काम करत आहेत. आम्ही लवकरात लवकर या शाळांमध्ये मुख्याध्यापकांची नियुक्ती करू.