धक्कादायक! परदेशातून मेडिकलचे शिक्षण घेतलेल्या FMGE चा निकाल जाहीर, फक्त १२.३८ टक्के विद्यार्थी पास
भारतीय विद्यार्थ्यांना लाखो रुपये खर्च करून आणि वर्षानुवर्षे परदेशात राहूनही भारतात डॉक्टर म्हणून नोंदणी करण्यासाठी प्रचंड संघर्ष करावा लागत आहे. या निकालाने अनेक विद्यार्थी आणि पालकांच्या आशांवर पाणी पडले आहे.
eduvarta@gmail.com 
एज्युवार्ता न्यूज नेटवर्क
नॅशनल बोर्ड ऑफ एक्झामिनेशन्स इन मेडिकल सायन्सेसने (NBEMS) फॉरेन मेडिकल ग्रॅज्युएट एक्झामिनेशन (FMGE) जून २०२६ सत्राचा निकाल जाहीर (Results Declared) केला आहे. परदेशात वैद्यकीय शिक्षण घेतलेल्या भारतीय विद्यार्थ्यांसाठी ही परीक्षा भारतात प्रॅक्टिस करण्यासाठी अनिवार्य आहे. मात्र, यंदा फक्त १२.३८ टक्के इतका कमी निकाल समोर आल्यानंतर वैद्यकीय क्षेत्रात खळबळ उडाली आहे. इतकी कमी पास टक्केवारी (Low pass percentage) पाहता परदेशातील वैद्यकीय शिक्षणाचा दर्जा आणि एफएमजीई परीक्षेची कठीण पातळी यावर गंभीर प्रश्न उपस्थित झाले आहेत.
देशभरातील ३७ हजार ४४८ विद्यार्थ्यांनी परीक्षा दिली, त्यापैकी केवळ ५ हजार ८६ विद्यार्थी उत्तीर्ण झाले आहेत. उर्वरित ३१ हजार ६४५ विद्यार्थी अपयशी ठरले असून, १ हजार १४८ विद्यार्थी गैरहजर होते. रशिया, चीन, युक्रेन, नेपाळ, फिलिपाइन्ससारख्या देशांमध्ये एमबीबीएस पूर्ण करणाऱ्या हजारो भारतीय विद्यार्थ्यांना लाखो रुपये खर्च करून आणि वर्षानुवर्षे परदेशात राहूनही भारतात डॉक्टर म्हणून नोंदणी करण्यासाठी प्रचंड संघर्ष करावा लागत आहे. या निकालाने अनेक विद्यार्थी आणि पालकांच्या आशांवर पाणी पडले आहे.
एफएमजीई ही स्क्रीनिंग टेस्ट परदेशी पदवीधरांना भारतात वैद्यकीय व्यवसाय करण्यास परवानगी देते. या परीक्षेत यशस्वी झाल्याशिवाय स्टेट मेडिकल कौन्सिलमध्ये नोंदणी शक्य नाही. परदेशी डिग्री असूनही परीक्षा उत्तीर्ण न झाल्यास भारतात प्रॅक्टिस करणे बेकायदेशीर ठरते. एनबीईएमएसने परीक्षेतील प्रश्नांचे तज्ज्ञांकडून सखोल पुनरावलोकन केल्याचे सांगितले असून, तांत्रिक चुका आढळलेल्या प्रश्नांसाठी सर्व उमेदवारांना बोनस गुण दिले आहेत.
यशस्वी झालेल्या विद्यार्थ्यांचे स्कोअरकार्ड १६ जुलै २०२६ पासून अधिकृत वेबसाइट natboard.edu.in वर उपलब्ध होणार आहेत. मात्र, स्कोअरकार्ड डाउनलोड करण्यासाठी केवळ सहा महिन्यांची मुदत देण्यात आली आहे. या कालावधीनंतर कोणत्याही परिस्थितीत स्कोअरकार्ड उपलब्ध होणार नाही, असे बोर्डाने स्पष्ट केले आहे. केवळ स्कोअरकार्डावर नोंदणी होणार नसून, ओळख आणि कागदपत्रांची सखोल पडताळणी केल्यानंतरच मूळ पासिंग प्रमाणपत्र दिले जाईल.
हा निकाल परदेशात मेडिकल शिक्षण घेणाऱ्या विद्यार्थ्यांसाठी चेतावणीचा विषय ठरला आहे. आता विद्यार्थ्यांनी दर्जेदार संस्थांची निवड, अभ्यास पद्धती आणि एफएमजीईच्या तयारीवर अधिक लक्ष केंद्रित करण्याची गरज आहे. एनबीईएमएस च्या या निर्णयामुळे परदेशी वैद्यकीय शिक्षण घेणाऱ्या विद्यार्थ्यांच्या भविष्यावर मोठा परिणाम होणार असल्याचे स्पष्ट दिसत आहे.
