यूजीसी-नेट डिसेंबर २०२६: विषयनिहाय वेळापत्रक जाहीर, १४ ते २१ डिसेंबरदरम्यान परीक्षा
राष्ट्रीय परीक्षा एजन्सीने (एनटीए) युजीसी-नेट डिसेंबर २०२६ परीक्षेचे विषयनिहाय सविस्तर वेळापत्रक अधिकृतरीत्या जाहीर केले आहे. संगणक आधारित पद्धतीने होणाऱ्या या परीक्षेच्या तारखा १४ डिसेंबर ते १८ डिसेंबर आणि त्यानंतर २१ डिसेंबर २०२६ अशा निश्चित करण्यात आल्या आहेत.
एज्युवार्ता न्यूज नेटवर्क
राष्ट्रीय परीक्षा एजन्सीने (एनटीए) युजीसी-नेट डिसेंबर २०२६ परीक्षेचे विषयनिहाय सविस्तर वेळापत्रक अधिकृतरीत्या जाहीर केले आहे. संगणक आधारित पद्धतीने होणाऱ्या या परीक्षेच्या तारखा १४ डिसेंबर ते १८ डिसेंबर आणि त्यानंतर २१ डिसेंबर २०२६ अशा निश्चित करण्यात आल्या आहेत. दररोज सकाळी आणि दुपारी अशी दोन सत्रे असतील. पहिले सत्र सकाळी ९ ते १२ वाजेपर्यंत तर दुसरे सत्र दुपारी ३ ते सायंकाळी ६ वाजेपर्यंत चालेल. उमेदवारांनी अधिकृत संकेतस्थळावर नियमितपणे भेट देऊन अद्ययावत माहिती तपासावी, असे आवाहन करण्यात आले आहे.
१४ डिसेंबर रोजी सकाळच्या सत्रात इतिहास, पाली, प्राकृत, बंगाली, तुलनात्मक साहित्य, संगीत, लोक प्रशासन, शिक्षण, समाजकार्य आणि मल्याळम या विषयांची परीक्षा होईल. दुपारच्या सत्रात संगणक शास्त्र व अनुप्रयोग, पर्शियन, रशियन, गृहविज्ञान, लोकसंख्या अभ्यास, मानसशास्त्र, मैथिली, अरेबिक आणि व्यवस्थापन यांचा समावेश असेल. दुसऱ्या दिवशी म्हणजे १५ डिसेंबरला सकाळी उर्दू, गुन्हेशास्त्र, संस्कृत पारंपरिक विषय, आदिवासी भाषा साहित्य, लोकसाहित्य, राज्यशास्त्र, धर्मांचा तुलनात्मक अभ्यास, जपानी, डोगरी, राजस्थानी आणि इंग्रजी यांची परीक्षा होईल. दुपारच्या सत्रात शारीरिक शिक्षण, परफॉर्मिंग आर्ट, आयुर्वेद जीवशास्त्र, आपत्ती व्यवस्थापन, वाणिज्य, संरक्षण अभ्यास, भारतीय संस्कृती, बौद्ध-जैन-गांधीवादी अभ्यास, भाषाशास्त्र आणि व्हिज्युअल आर्ट या विषयांची परीक्षा घेतली जाईल.

१६ डिसेंबर रोजी सकाळच्या सत्रात चिनी, कोकणी, स्पॅनिश आणि काश्मिरी या विषयांची तर दुपारच्या सत्रात म्युझिओलॉजी, पंजाबी, तमिळ, भूगोल आणि मराठी यांची परीक्षा होईल. १७ डिसेंबरला सकाळी हिंदी, अरब संस्कृती व इस्लामिक अभ्यास, भारतीय ज्ञान प्रणाली, मणिपुरी, कन्नड, जर्मन, सिंधी, फ्रेंच, अर्थशास्त्र, पर्यावरणशास्त्र, हिंदू अभ्यास आणि मानववंशशास्त्र यांचा समावेश असेल. दुपारच्या सत्रात कामगार कल्याण, संथाली, जनसंवाद व पत्रकारिता, इलेक्ट्रॉनिक सायन्स, महिला अभ्यास, कायदा, तेलुगू, न्यायवैद्यक शास्त्र, नेपाळी, ग्रंथालय विज्ञान, तत्त्वज्ञान, आसामी, समाजशास्त्र, योग आणि पर्यटन प्रशासन या विषयांची परीक्षा होईल.
परीक्षेचा शेवटचा दिवस २१ डिसेंबर असून सकाळच्या सत्रात बोडो, गुजराती, संस्कृत, आंतरराष्ट्रीय संबंध आणि मानवी हक्क या विषयांची परीक्षा होईल. दुपारच्या सत्रात प्रौढ शिक्षण, पुरातत्त्वशास्त्र, उडिया, सामाजिक औषधशास्त्र, सांख्यिकी आणि वनीकरण या विषयांची परीक्षा घेतली जाईल. परीक्षा केंद्राचे शहर दर्शवणारी सूचना परीक्षेच्या २१ दिवस आधी एनटीएच्या अधिकृत संकेतस्थळावर उपलब्ध होईल, असे कळवण्यात आले आहे.
उमेदवारांनी https://ugcnet.nta.nic.in/ या संकेतस्थळावर नियमित भेट देऊन सर्व अद्ययावत सूचना तपासाव्यात. अधिक माहितीसाठी ०११-४०७५९००० या क्रमांकावर संपर्क साधावा किंवा ugcnet@nta.ac.in या ई-मेलवर चौकशी करावी, असे आवाहन करण्यात आले आहे.