मुंबई विद्यापीठ : एमएमएस आणि एमसीए अभ्यासक्रम अर्जासाठी १४ जुलैपर्यंत मुदत
दोन्ही अभ्यासक्रमांच्या प्रवेश परीक्षा १९ जुलै २०२६ रोजी ऑनलाइन पद्धतीने घेण्यात येणार आहेत. प्रवेश प्रक्रियेसाठी नोंदणी १२ जूनपासून सुरू झाली होती. सुरुवातीला ३० जूनपर्यंत मुदत होती, त्यानंतर ७ जुलैपर्यंत मुदतवाढ देण्यात आली. आता १४ जुलै ही अंतिम तारीख ठरवण्यात आली आहे.
eduvarta@gmail.com 
एज्युवार्ता न्यूज नेटवर्क
मुंबई विद्यापीठाच्या (Mumbai University) दूरस्थ व ऑनलाइन शिक्षण केंद्र (सीडीओई) मार्फत चालविण्यात येणाऱ्या दोन वर्षीय मास्टर ऑफ मॅनेजमेंट स्टडीज (एमएमएस) आणि मास्टर ऑफ कम्प्युटर अॅप्लिकेशन (एमसीए) अभ्यासक्रमांच्या ऑनलाइन प्रवेश परीक्षेसाठी (MMS and MCA Entrance Exam) अर्ज भरण्याची मुदत वाढवून १४ जुलै २०२६ पर्यंत (Extension of the application deadline) करण्यात आली आहे. ही अंतिम मुदत असल्याचे विद्यापीठाने स्पष्ट केले आहे. इच्छुक विद्यार्थ्यांनी https://mucdoeadm.samarth.edu.in या संकेतस्थळावरून अर्ज सादर करावा, असे आवाहन करण्यात आले आहे.
एआयसीटीई आणि यूजीसीने मान्यता दिलेला एमएमएस हा अभ्यासक्रम एमबीएच्या समकक्ष मानला जातो. एचआर, फायनान्स आणि मार्केटिंग या तीन विशेषीकरणांमध्ये हा अभ्यासक्रम उपलब्ध आहे. एमसीए हा सुधारित दोन वर्षांचा अभ्यासक्रम असून, दोन्ही अभ्यासक्रम युजीसी व एआयसीटीई मान्यताप्राप्त आहेत. या अभ्यासक्रमांसाठी एमएमएसला ७२० जागा आणि एमसीएला २ हजार जागा उपलब्ध आहेत. दूरस्थ शिक्षण घेऊ इच्छिणाऱ्या विद्यार्थ्यांसाठी ही उत्तम संधी आहे.
दोन्ही अभ्यासक्रमांच्या प्रवेश परीक्षा १९ जुलै २०२६ रोजी ऑनलाइन पद्धतीने घेण्यात येणार आहेत. प्रवेश प्रक्रियेसाठी नोंदणी १२ जूनपासून सुरू झाली होती. सुरुवातीला ३० जूनपर्यंत मुदत होती, त्यानंतर ७ जुलैपर्यंत मुदतवाढ देण्यात आली. आता १४ जुलै ही अंतिम तारीख ठरवण्यात आली आहे. विद्यार्थ्यांनी वेळेत अर्ज पूर्ण करण्याचे आवाहन सीडीओई संचालक प्रा. शिवाजी सरगर यांनी केले आहे.
अभ्यासक्रमाच्या पात्रता, प्रवेश शुल्क, परीक्षा पॅटर्न आणि इतर महत्त्वाच्या सूचना मुंबई विद्यापीठाच्या https://cdoe.uom.edu.in या अधिकृत संकेतस्थळावर उपलब्ध आहेत. विद्यार्थ्यांनी अर्ज भरताना सर्व कागदपत्रे तयार ठेवावीत आणि संकेतस्थळावरील सूचनांचे काळजीपूर्वक पालन करावे. या अभ्यासक्रमांमुळे विशेषतः नोकरी करणाऱ्या आणि नियमित कॉलेजला प्रवेश न मिळालेल्या विद्यार्थ्यांना उच्च शिक्षणाची संधी मिळणार आहे.
मुंबई विद्यापीठाच्या सीडीओईने सुरू केलेल्या या अभ्यासक्रमांमुळे दूरस्थ आणि ऑनलाइन शिक्षण क्षेत्रात नवी उभारी मिळाली आहे. इच्छुक विद्यार्थ्यांनी १४ जुलैपूर्वी अर्ज करून १९ जुलैच्या प्रवेश परीक्षेची तयारी करावी. अधिक माहितीसाठी विद्यापीठाच्या वेबसाइटला भेट देण्याचे आवाहन करण्यात आले आहे.
