SPPU विद्यापीठात घोटाळेच घोटाळे; निनावी पत्रात गंभीर आरोप

एज्युवार्ता न्यूज नेटवर्क

सावित्रीबाई फुले पुणे विद्यापीठात विविध इलेक्ट्रिक वस्तू व उपकरण  खरेदीत घोटाळे झाल्याचा आरोप करणारे एक निनावी पत्र काही निवडक व्यवस्थापन परिषद सदस्यांना पाठविण्यात आले आहे. परंतु, त्यावर अद्याप कोणीही भाष्य केले नाही. एका ' झुंजार ' व्यक्तिमत्वाच्या अनमोल अशा कारणाम्यांचा उल्लेख त्यात करण्यात आला आहे. परंतु, निनावी असल्याने विद्यापीठ याची दखल घेणार का? असा सवाल उपस्थित होत आहे.

विद्यापीठात बसवण्यात आलेले अनेक CCTV कॅमेरे बंद पडले आहेत. महापुरुषांच्या पुतळ्यांजवळ बसवण्यात आलेले काही कॅमेरे बंद आहेत. निनावी पत्रात कंत्राटदाराला हाताशी धरून कॅमेरे जुन्याचे नवे केले गेले, असा आरोप करण्यात आला आहे. त्यातच फायर ऑप्टिकल केबल दुरुस्ती प्रकरणात घोटाळा झाल्याचा आरोप या पत्रात आहे.

टेक्टिकल कमिटीची दिशाभूल करून हा घोटाळा केल्याचे नमूद करण्यात आले आहे.हा  सर्वात मोठा घोटाळा ह्या महाभागाने केला आहे. खड्डे काढून त्यामध्ये नुसतीच केबल पुरली, काही ठिकाणी नुसतेच खड्डे काढले आणि जुनीच केबल पुरली, त्याची जोडणी अद्याप केलेलीच नाही. मुळात गरज नसताना केवळ मोठी रक्कम मिळवण्याच्या उद्देशाने हा प्रकल्प विद्यापीठाच्या गळी उतरवला. विद्यापीठातील इंटरनेट आणि नेटवर्क कॉनेक्टिव्हिटी ह्याची दुरावस्था आजही तशीच आहे. विद्यापीठातील काही अधिकाऱ्यांच्या सहकार्याने हा घोटाळा केला गेला. फायबर केबलची लांबी, त्याचा प्रकार, इतर माहिती आणि बाजारातील किंमत हे सर्व पाहता ह्या प्रकरणात खूप मोठा आर्थिक लाभ अत्यंत 'झुंजार' अशा या व्यक्तिमत्वाने उठवला. विद्यापीठास सर्व माहिती असताना सुद्धा काहीही कारवाई होत नाही ह्याचा खेद वाटतो,असेही या पत्रात नमूद केले आहे.

काही व्यवस्थापन परिषद सदस्यांना पाठविण्यात आलेले निनावी पत्र हे विद्यापीठातील प्रमुख अधिकाऱ्यांना सुद्धा पाठवले आले होते. मात्र, नेहमी प्रमाणे त्यावर कोणतीही कारवाई झाली नाही. घोटाळेबाज याने परदेश दौरे, देशांतर्गत सहली आणि परदेशी विद्यापीठाच्या अभ्यासक्रमाची फी भरणे, भेटवस्तू स्वीकारणे अशा स्वरूपात कंत्राटदाराकडून मोबदला घेतला आहे, असाही आरोप या पत्रात केला आहे. ' हाती हे पत्र लागले, असून त्यावर संबंधितांशी अधिकारी यांच्याशी संवाद साधून या प्रकरणावर प्रकाश टाकण्यात येणार आहे.