स्वातंत्र्य हा केवळ उत्साहाचा दिवस नसून आत्मपरीक्षणाचा दिवस: कुलगुरू डॉ. सुरेश गोसावी

एज्युवार्ता न्यूज नेटवर्क 

"स्वातंत्र्य हा केवळ उत्साहाचा दिवस नसून आत्मपरीक्षणाचा दिवस आहे. आजच्या तंत्रज्ञानाच्या युगात विद्यार्थ्यांमध्ये केवळ माहिती भरणे पुरेसे नसून, त्यांच्यात विवेक, समीक्षात्मक विचार (Critical Thinking) आणि सामाजिक जाणीव निर्माण करणे हेच विद्यापीठाचे मुख्य ध्येय आहे," असे प्रतिपादन सावित्रीबाई फुले पुणे विद्यापीठाचे कुलगुरू प्रा. डॉ. सुरेश गोसावी यांनी केले.

विद्यापीठाच्या प्रांगणात आयोजित ८० व्या स्वातंत्र्यदिनानिमित्त कुलगुरू प्रा. डॉ. सुरेश गोसावी यांच्या हस्ते ध्वजारोहण करण्यात आले. याप्रसंगी प्र-कुलगुरू प्रा. डॉ. पराग कालकर, व्यवस्थापन परिषद सदस्य रविंद्र शिंगणापूरकर, बागेश्री मंठाळकर, कुलसचिव प्रा. डॉ. प्रफुल्ल पवार, वित्त व लेखाधिकारी सीएमए डॉ. चारुशीला गायके, परीक्षा व मूल्यमापन मंडळाचे संचालक डॉ. राजेंद्र तलवारे आणि प्रा. डॉ. विलास आढाव यांच्यासह अधिसभा व विद्या परिषदेचे सदस्य, प्राध्यापक, संशोधक व विद्यार्थी मोठ्या संख्येने उपस्थित होते.

 'क्यूएस वर्ल्ड रँकिंग २०२६' मध्ये विद्यापीठाने ७९१ व्या स्थानावर मजल मारली असून, संशोधनातील गुंतवणूक व प्राध्यापकांची संख्या वाढवून आगामी काळात जगात अव्वल ५०० मध्ये येण्याचा संकल्प कुलगुरूंनी व्यक्त केला.

 राष्ट्रीय शैक्षणिक धोरण २०२० च्या प्रभावी अंमलबजावणीसाठी ४ वर्षांचा पदवी अभ्यासक्रम (FYUP) सुरू करण्यात आला आहे. विज्ञान, मानव्यविद्या, तंत्रज्ञान आणि अर्थशास्त्र यांचा समन्वय साधून विद्यार्थ्यांना शिक्षण दिले जात आहे. रोबोटिक्स, AI, क्लीन टेक आणि बायोटेक्नॉलॉजी क्षेत्रातील स्टार्टअप्सना विद्यापीठाच्या इनक्युबेशन सेंटरद्वारे प्रोत्साहन दिले जात आहे. तसेच, कतार (दोहा) येथील 'MESPPU' ऑफशोर कॅम्पसमुळे विद्यापीठाचा जागतिक विस्तार होत आहे,असेही त्यांनी सांगितले.

स्वातंत्र्यदिनाचे औचित्य साधून वनस्पतीशास्त्र विभागातील 'सेंटर फॉर मिलेट रिसर्च अँड ट्रेनिंग' (CMRT) तर्फे 'श्रीअन्न व तृणधान्य (मिलेट) प्रदर्शन' आणि लहान मुलांसाठी मिलेट क्राफ्ट स्पर्धा आयोजित करण्यात आली होती. तसेच, राष्ट्रीय औषधी वनस्पती मंडळ पुरस्कृत पश्चिम विभागीय सह सुविधा केंद्रातर्फे नागरिकांना १००० औषधी वनस्पतींच्या रोपांचे मोफत वाटप करण्यात आले.