१५ ऑगस्टला राज्यभरात घेणार 'तंबाखू मुक्तीची शपथ';शाळा आणि गावे होणार तंबाखूमुक्त

एज्युवार्ता न्यूज नेटवर्क 

महाराष्ट्र राज्य पूर्णपणे तंबाखूमुक्त करण्याच्या उद्देशाने १५ ऑगस्ट रोजी राष्ट्रीय स्वातंत्र्यदिनानिमित्त राज्यभरात **'तंबाखू मुक्त शपथ'** उपक्रम राबविण्याचे आदेश देण्यात आले आहेत. सार्वजनिक आरोग्य विभाग आणि राष्ट्रीय आरोग्य अभियानांतर्गत शासकीय, निमशासकीय, खासगी कार्यालये, शाळा, महाविद्यालये आणि ग्रामपंचायतींमध्ये या मोहिमेचे आयोजन केले जाणार आहे.

या संदर्भातील आदेश भारतीय प्रशासकीय सेवेतील वरिष्ठ अधिकारी संजय श्रीपतराव काटकर यांनी जारी केले आहेत. त्यावर शिक्षण विभागाने सर्व शाळांना कार्यवाहीची अंमलबजावणी करण्याचे आदेश दिले आहेत.

 १५ ऑगस्टच्या मुख्य ध्वजारोहण आणि सांस्कृतिक कार्यक्रमानंतर तंबाखूजन्य पदार्थांचे सेवन व त्याचे दुष्परिणाम यावर विशेष व्याख्यानांचे आयोजन केले जाईल. तसेच उपस्थितांना तंबाखू मुक्तीची सामूहिक शपथ दिली जाईल. १० जुलै २०२३ च्या शासन निर्णयानुसार, सर्व शासकीय व निमशासकीय कार्यालयांचा परिसर संपूर्णत: धुम्रपान व तंबाखूमुक्त घोषित करून तसे औपचारिक घोषणापत्र जाहीर करावे लागणार आहे.

 केंद्र सरकारच्या मार्गदर्शक तत्त्वांनुसार "धूरमुक्त किंवा तंबाखूमुक्त गाव" आणि "धूरमुक्त किंवा तंबाखूमुक्त जिल्हा" घोषित करण्यासाठी विशेष मोहीम राबवली जाईल. संयुक्त अंमलबजावणी ही मोहीम शालेय शिक्षण विभाग, गृह विभाग, आरोग्य विभाग आणि स्थानिक सामाजिक संस्था (NGOs) यांच्या संयुक्त विद्यमाने दरवर्षी प्रभावीपणे राबवली जाणार आहे.