महाराष्ट्र हादरला! आश्रम शाळेत नववीत शिकणाऱ्या अल्पवयीन विद्यार्थिनीने दिला बाळाला जन्म

एज्युवार्ता न्यूज नेटवर्क 

नाशिक जिल्ह्यातील (Nashik Crime News) कळवण तालुक्यातील सप्तशृंगी गडाच्या पायथ्याशी असलेल्या मोहनदरी शासकीय आश्रमशाळेत (Mohandari Government Ashram School) एक धक्कादायक घटना समोर आली आहे. इयत्ता नववीत शिकणाऱ्या अल्पवयीन आदिवासी विद्यार्थिनीने बाळाला जन्म दिल्याने (The female student gave birth to a baby) संपूर्ण महाराष्ट्र हादरला आहे. या प्रकारामुळे आदिवासी विकास विभागाच्या देखरेखीखालील आश्रमशाळांमधील विद्यार्थिनींच्या सुरक्षितता आणि आरोग्य व्यवस्थापनावर गंभीर प्रश्न उपस्थित (Serious questions regarding safety) झाले आहेत. 

या घटनेनंतर पोलिसांत गुन्हा दाखल करण्यात आला असून, संबंधित अल्पवयीन आरोपी विद्यार्थिनीचा नातेवाईक याला बाल न्याय व्यवस्थेनुसार बालसुधारगृहात पाठवण्यात आले आहे. आदिवासी विकास विभागाचे अप्पर आयुक्त दिनकर पावरा यांनी याची माहिती दिली. शासकीय आश्रमशाळा आदिवासी विद्यार्थ्यांच्या शिक्षण, निवास आणि सर्वांगीण विकासासाठी उभारल्या जातात. मात्र, या घटनेने शैक्षणिक संस्थांमधील देखरेख आणि संरक्षण यंत्रणेच्या प्रभावी अंमलबजावणीवर शंका निर्माण झाली आहे.

आश्रमशाळांमध्ये दरमहा विद्यार्थिनींची आरोग्य तपासणी आणि मासिक पाळी संबंधित वैद्यकीय तपासणी केली जाते, असे शासन स्तरावर सांगितले जाते. तरीही विद्यार्थिनी गर्भवती राहिल्याची बाब शाळा प्रशासन, वसतीगृह अधीक्षक, मुख्याध्यापक किंवा वैद्यकीय अधिकारी यांच्या लक्षात येऊ नये, ही बाब अत्यंत गंभीर आहे. विद्यार्थिनींच्या शैक्षणिक प्रगतीसोबत शारीरिक आणि मानसिक आरोग्याकडे दुर्लक्ष झाल्याचे चित्र निर्माण झाले आहे. अशा घटनांमुळे विद्यार्थिनींच्या शिक्षणात व्यत्यय येतो आणि त्यांचे भविष्य धोक्यात येते.

आदिवासी विकास विभागाकडून आश्रमशाळांसाठी मोठ्या प्रमाणात निधी उपलब्ध करून दिला जातो. तरीही देखरेखीची त्रुटी दिसून येत असल्याने अधिकारी, कर्मचारी आणि व्यवस्थापनाची सखोल चौकशी करण्याची मागणी जोर धरली आहे. अप्पर आयुक्त दिनकर पावरा यांनी खेद व्यक्त करत प्रकरणाची सखोल चौकशी सुरू असल्याचे आणि दोषींवर कठोर कारवाई केली जाईल, असे स्पष्ट केले आहे. या घटनेमुळे आश्रमशाळांमधील सुरक्षितता प्रोटोकॉलची अंमलबजावणी अधिक कडक करण्याची गरज निर्माण झाली आहे.

या निरागस विद्यार्थिनीच्या आयुष्यातील या घटनेने शैक्षणिक क्षेत्रात अंतर्मुख होण्याची गरज निर्माण केली आहे. आश्रमशाळा केवळ शिक्षण केंद्र नसून, विद्यार्थ्यांसाठी सुरक्षित आश्रयस्थान असावेत. भविष्यात अशा घटना टाळण्यासाठी नियमित मनोवैज्ञानिक समुपदेशन, कडक सुरक्षा व्यवस्था, तंत्रज्ञानाचा वापर आणि जबाबदार कर्मचाऱ्यांची नेमणूक यासारख्या ठोस उपाययोजना करण्याची मागणी शिक्षण तज्ज्ञ आणि सामाजिक कार्यकर्ते करत आहेत.