दहावी उत्तीर्णांसाठी नोकरीची सुवर्णसंधी! 'बेस्ट' अंतर्गत ३६४ बस वाहक पदांसाठी भरती सुरु

एज्युवार्ता न्यूज नेटवर्क

मुंबईत सरकारी नोकरीच्या शोधात असलेल्या तरुणांसाठी महत्त्वाची बातमी समोर आली आहे. बृहन्मुंबई विद्युत पुरवठा आणि परिवहन उपक्रम (बेस्ट)  (BEST Recruitment -2026) अंतर्गत बस वाहक (Bus Conductor) पदांची भरती प्रक्रिया सुरू (Recruitment process Start) करण्यात आली आहे. या भरतीअंतर्गत एकूण ३६४ जागा भरण्यात येणार आहेत. दहावी उत्तीर्ण उमेदवारांसाठी ही मोठी संधी असून, इच्छुक आणि पात्र उमेदवारांना २९ जुलै २०२६ पर्यंत (Deadline until July 29) अधिकृत संकेतस्थळ bestundertaking.com वर जाऊन ऑनलाइन पद्धतीने अर्ज करण्याचे आवाहन करण्यात आले आहे. 

अर्ज करण्यासाठी उमेदवारांनी किमान ५० टक्के गुणांसह एसएससी उत्तीर्ण असणे आवश्यक आहे. तसेच, उमेदवाराकडे वैध बस वाहक परवाना आणि बिल्ला असणे अनिवार्य आहे. शारीरिक निकषांनुसार उंची १५४ ते १७८ सेंटीमीटर आणि किमान वजन ४५ किलो असावे. वयोमर्यादा २९ जुलै २०२६ रोजी १८ ते ३८ वर्षे दरम्यान असावी. मागासवर्गीय उमेदवारांसाठी ५ वर्षांची वयोमर्यादा सवलत देण्यात आली आहे. 

भरती प्रक्रियेत सहभागी होण्यासाठी खुल्या प्रवर्गातील उमेदवारांना १००० रुपये तर राखीव प्रवर्गातील उमेदवारांना ९०० रुपये भरावे लागतील. भरती प्रक्रियेत निवड झालेल्या उमेदवारांना मूळ वेतन २२,०६० रुपये मिळेल. यासोबत महागाई भत्ता, घरभाडे भत्ता, वैद्यकीय भत्ता, गणवेश धुलाई भत्ता, रजा रोखकरण आणि रजा प्रवास भत्ता यांचा समावेश असेल. सर्व भत्त्यांसह एकूण मासिक पगार सुमारे ३६,००० रुपये इतका होईल. 

बेस्ट बसमधून मोफत प्रवासाची सुविधा देखील निवड झालेल्या कर्मचाऱ्यांना उपलब्ध असेल. ही भरती मुंबई शहरात होणार असल्याने स्थानिक तरुणांना घरापासून नोकरी मिळण्याची संधी उपलब्ध झाली आहे. परीक्षेची तारीख लवकरच जाहीर करण्यात येणार असून, उमेदवारांनी अधिकृत वेबसाइटवर नियमित अपडेट तपासणे गरजेचे आहे.