तीन वर्ष एलएलबी, बीपीएड व एमपीएड प्रवेश नोंदणीस पुन्हा मुदतवाढ
सीईटी कक्षाने दिलेल्या माहितीनुसार १० जुलै २०२६ पर्यंत या तीनही अभ्यासक्रमांसाठी एकूण ५९ हजार ११७ विद्यार्थ्यांनी प्रवेश नोंदणी केली आहे. त्यामध्ये ३ वर्षीय एलएलबीसाठी ५३ हजार ६९, बीपीएडसाठी ४ हजार २४८ आणि एमपीएडसाठी १ हजार ८०० विद्यार्थ्यांनी नोंदणी केली आहे.
eduvarta@gmail.com 
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा (सीईटी) कक्षाने शैक्षणिक वर्ष २०२६-२७ साठी उच्च शिक्षण विभागांतर्गत राबविण्यात येणाऱ्या ३ वर्षीय एलएलबी, बॅचलर ऑफ फिजिकल एज्युकेशन (बीपीएड) आणि मास्टर ऑफ फिजिकल एज्युकेशन (एमपीएड) या अभ्यासक्रमांच्या केंद्रीभूत प्रवेश प्रक्रियेच्या ऑनलाईन नोंदणीस १३ जुलै २०२६ पर्यंत मुदतवाढ दिली आहे.सीईटी सेलने ही दुसरी मुडतावाढ दिली आहे.
या तीनही अभ्यासक्रमांच्या प्रवेश नोंदणीला ११ जून २०२६ रोजी प्रारंभ झाला होता. पहिली मुदतवाढ ८ जुलैपर्यंत देण्यात आली होती. विद्यार्थ्यांच्या सोयीचा विचार करून आता ९ जुलै ते १३ जुलै २०२६ या कालावधीत दुसरी मुदतवाढ जाहीर करण्यात आली आहे.
सीईटी कक्षाने दिलेल्या माहितीनुसार १० जुलै २०२६ पर्यंत या तीनही अभ्यासक्रमांसाठी एकूण ५९ हजार ११७ विद्यार्थ्यांनी प्रवेश नोंदणी केली आहे. त्यामध्ये ३ वर्षीय एलएलबीसाठी ५३ हजार ६९, बीपीएडसाठी ४ हजार २४८ आणि एमपीएडसाठी १ हजार ८०० विद्यार्थ्यांनी नोंदणी केली आहे.
मार्च-एप्रिल २०२६ मध्ये संबंधित अभ्यासक्रमांची सीईटी परीक्षा दिलेल्या विद्यार्थ्यांनी या मुदतीचा लाभ घेऊन केंद्रीभूत प्रवेशासाठी ऑनलाईन नोंदणी पूर्ण करावी, असे आवाहन सीईटी कक्षाने केले आहे.
नोंदणी करताना विद्यार्थ्यांनी पासपोर्ट आकाराचे रंगीत छायाचित्र आणि स्वाक्षरीची प्रतिमा (Signature Image) निर्धारित आकारात जेपीजी/जेपीईजी स्वरूपात अपलोड करावी. तसेच शैक्षणिक व इतर आवश्यक कागदपत्रे निर्धारित आकारात पीडीएफ स्वरूपात स्कॅन करून ऑनलाईन अर्जासोबत अपलोड करणे आवश्यक आहे. आवश्यक कागदपत्रांची सविस्तर यादी सीईटी कक्षाच्या संकेतस्थळावर उपलब्ध असल्याचेही कक्षाने स्पष्ट केले आहे.
१० जुलै २०२६ पर्यंतची प्रवेश नोंदणी :
| अभ्यासक्रम | सीईटी दिलेले विद्यार्थी | नोंदणी झालेले विद्यार्थी |
|---|---|---|
| बीपीएड | ४,९६५ | ४,२४८ |
| एमपीएड | २,१३४ | १,८०० |
| ३ वर्षीय एलएलबी | ६९,४७३ | ५३,०६९ |
