हिमाचल प्रदेशाचे राज्यपाल कविंदर गुप्ता यांच्या हस्ते लेक्सिकॉन माईलच्या पीजीडीएम व एमबीए ग्लोबल बॅच २०२६-२८ च्या इंडक्शन कार्यक्रमाचे उद्घाटन
हिमाचल प्रदेशाचे राज्यपाल कविंदर गुप्ता प्रमुख पाहुणे म्हणून उपस्थित होते. त्यांनी विद्यार्थ्यांना नेतृत्वगुण, नवोपक्रम आणि सामाजिक जबाबदारी स्वीकारण्याचे आवाहन केले. आगामी २१ दिवसांचा कालावधी केवळ नवीन वातावरणाशी जुळवून घेण्यासाठी नव्हे, तर स्वतःमधील नेतृत्वक्षमतेचा शोध घेण्यासाठी वापरावा, असे त्यांनी विद्यार्थ्यांना सांगितले.
eduvarta@gmail.com 
एज्युवार्ता न्यूज नेटवर्क
लेक्सिकॉन मॅनेजमेंट इन्स्टिट्यूट ऑफ लीडरशिप अँड एक्सलन्स (लेक्सिकॉन माईल) येथे पीजीडीएम आणि एमबीए ग्लोबल बॅच २०२६-२८ साठी आयोजित करण्यात आलेल्या 'ट्रान्सेंड – राईज अबव्ह लिमिट्स' या २१ दिवसीय इंडक्शन कार्यक्रमाची सोमवारी उत्साहात सुरुवात झाली. व्यवस्थापन शिक्षणातील आव्हाने, कॉर्पोरेट क्षेत्रातील अपेक्षा आणि नेतृत्व कौशल्यांचा विकास यासाठी विद्यार्थ्यांना तयार करण्याच्या उद्देशाने या कार्यक्रमाचे आयोजन करण्यात आले आहे.
या कार्यक्रमाच्या उद्घाटनप्रसंगी हिमाचल प्रदेशाचे राज्यपाल कविंदर गुप्ता प्रमुख पाहुणे म्हणून उपस्थित होते. त्यांनी विद्यार्थ्यांना नेतृत्वगुण, नवोपक्रम आणि सामाजिक जबाबदारी स्वीकारण्याचे आवाहन केले. आगामी २१ दिवसांचा कालावधी केवळ नवीन वातावरणाशी जुळवून घेण्यासाठी नव्हे, तर स्वतःमधील नेतृत्वक्षमतेचा शोध घेण्यासाठी वापरावा, असे त्यांनी विद्यार्थ्यांना सांगितले.
यावेळी पंकज शर्मा, अध्यक्ष, द लेक्सिकॉन ग्रुप ऑफ इन्स्टिट्यूट्स तसेच चेअरमन व व्यवस्थापकीय संचालक, पुणे टाइम्स मिरर, सिव्हिक मिरर आणि मल्टीफिट यांनी 'ट्रान्सेंड – राईज अबव्ह लिमिट्स' ही केवळ संकल्पना नसून विद्यार्थ्यांना त्यांच्या मर्यादा ओलांडून भविष्यकालीन नेतृत्वासाठी सक्षम बनविण्याचे तत्त्वज्ञान असल्याचे सांगितले. विद्यार्थ्यांचा आत्मविश्वास, जिद्द आणि नेतृत्वगुण विकसित करण्यासाठी हा २१ दिवसांचा विशेष कार्यक्रम आखण्यात आल्याचे त्यांनी नमूद केले.
नीरज शर्मा, उपाध्यक्ष, द लेक्सिकॉन ग्रुप यांनी विद्यार्थ्यांना पहिल्याच दिवसापासून उद्योग क्षेत्रातील तज्ज्ञ आणि कॉर्पोरेट नेत्यांशी संवाद साधण्याची संधी उपलब्ध करून देत असल्याचे सांगितले. त्यामुळे विद्यार्थ्यांच्या व्यावसायिक प्रवासाची सुरुवात वर्गातील शिक्षणापूर्वीच प्रत्यक्ष अनुभवातून होत असल्याचे त्यांनी स्पष्ट केले.
श्रेया शर्मा, विश्वस्त, द लेक्सिकॉन ग्रुप तसेच सीईओ आणि संस्थापक, रेस्ट द केस यांनी इंडक्शन कार्यक्रम हा केवळ ओळखपर कार्यक्रम नसून विद्यार्थ्यांना त्यांच्या ध्येय, मूल्ये आणि भविष्यातील वाटचालीबाबत आत्मपरीक्षण करण्याची संधी देणारा उपक्रम असल्याचे सांगितले.
या कार्यक्रमाला लेक्सिकॉन माईलचे मुख्य कार्यकारी अधिकारी संजीव यादव यांचीही उपस्थिती होती. त्यांनी नव्या विद्यार्थ्यांचे स्वागत करून त्यांच्या व्यवस्थापन शिक्षणाच्या प्रवासासाठी शुभेच्छा दिल्या.
कार्यक्रमात गौरव देसाई, डायरेक्टर – प्रोग्राम अँड प्रोजेक्ट मॅनेजमेंट, एलटीएम आणि अपर्णा अहिर, ह्युमन रिसोर्सेस बिझनेस पार्टनर, एमर्सन यांनी मार्गदर्शन केले. त्यांनी नेतृत्व, उद्योग क्षेत्रातील अपेक्षा, कार्यस्थळावरील कौशल्ये आणि करिअर घडविण्याबाबत विद्यार्थ्यांना महत्त्वपूर्ण माहिती दिली.
कार्यक्रमाचे आणखी एक वैशिष्ट्य म्हणजे पुणे टाइम्स मिररच्या सहकार्याने आयोजित करण्यात आलेला 'फ्युचर सिटीज फोरम २०२६' हा परिसंवाद. भारतातील शहरांचा आर्थिक विकास, शाश्वत नागरी पायाभूत सुविधा आणि सर्वसमावेशक विकास या विषयांवर या चर्चासत्रात सखोल चर्चा झाली.
या परिसंवादात कृष्णन कोमांडूर, मुख्य कार्यकारी अधिकारी, अदार पूनावाला क्लीन सिटी इनिशिएटिव्ह; हेमंत आर. शर्मा, डायरेक्टर – एचआर प्रोग्राम मॅनेजमेंट, मास्टरकार्ड; तसेच डॉ. नीरज सिंह राठोड, सहाय्यक प्राध्यापक, लेक्सिकॉन माईल यांनी सहभाग घेतला. या चर्चेचे सूत्रसंचालन तनिष्क महेश्वरी, लीड – प्रोफेशनल स्किल्स अँड कॉर्पोरेट अफेअर्स, लेक्सिकॉन माईल यांनी केले.
लेक्सिकॉन माईलचा हा २१ दिवसीय इंडक्शन कार्यक्रम नेतृत्व विकास, उद्योग क्षेत्रातील तज्ज्ञांशी संवाद, कौशल्यविकास कार्यशाळा आणि अनुभवाधारित शिक्षणाच्या माध्यमातून विद्यार्थ्यांना व्यवस्थापन क्षेत्रातील यशस्वी कारकिर्दीसाठी सक्षम करण्यावर भर देणार आहे.
