शिक्षकांच्या BLO च्या कामासाठी शाळा सकाळच्या सत्रात भरवा; शिक्षण विभागाचे निर्देश
शिक्षण विभागाने या सूचनांची तातडीने अंमलबजावणी करण्याचे आदेश दिले असून, शाळांनी केलेल्या कार्यवाहीचा अनुपालन अहवाल विहित नमुन्यात आणि निश्चित मुदतीत संबंधित कार्यालयाकडे सादर करण्याच्या सूचना देण्यात आल्या आहेत.
eduvarta@gmail.com 
एज्युवार्ता न्यूज नेटवर्क
विशेष सखोल पुनरिक्षण (Special Intensive Revision - SIR) कार्यक्रमांतर्गत मतदान केंद्रस्तरीय अधिकारी (BLO) म्हणून नियुक्त करण्यात आलेल्या शिक्षकांवरील कामाचा ताण कमी करण्यासाठी शिक्षण विभागाने सर्व शाळांना महत्त्वाच्या सूचना दिल्या आहेत. मतदार याद्या अचूक व दोषविरहित करण्यासाठी सुरू असलेल्या या मोहिमेदरम्यान शिक्षकांना BLO ची जबाबदारी प्रभावीपणे पार पाडता यावी, यासाठी शाळांनी अध्यापनाचे नियोजन बदलण्याचे निर्देश देण्यात आले आहेत.
शिक्षण विभागाच्या सूचनांनुसार येत्या ३० जुलै २०२६ पर्यंत BLO म्हणून नियुक्त शिक्षकांच्या अध्यापनाच्या तासिका शक्यतो कमी ठेवाव्यात. तसेच त्यांच्या शिकवणीच्या तासिका सलग नियोजित करून शक्य असल्यास शाळा सकाळच्या सत्रात भरविण्याचे नियोजन करावे. त्यामुळे संबंधित शिक्षकांना शैक्षणिक काम पूर्ण करून उर्वरित वेळेत BLO म्हणून नेमून दिलेली जबाबदारी कार्यक्षमतेने पार पाडता येणार आहे.
याशिवाय, BLO म्हणून नियुक्ती न झालेल्या शिक्षकांनी आवश्यकतेनुसार संबंधित शिक्षकांना शैक्षणिक तसेच इतर कामकाजात सहकार्य करावे, असेही निर्देश देण्यात आले आहेत. शाळा प्रमुखांनी अंतर्गत कामाचे नियोजन करताना BLO म्हणून नियुक्त शिक्षकांवर अतिरिक्त कामाचा ताण येणार नाही, याची दक्षता घ्यावी, असेही स्पष्ट करण्यात आले आहे.
शिक्षण विभागाने या सूचनांची तातडीने अंमलबजावणी करण्याचे आदेश दिले असून, शाळांनी केलेल्या कार्यवाहीचा अनुपालन अहवाल विहित नमुन्यात आणि निश्चित मुदतीत संबंधित कार्यालयाकडे सादर करण्याच्या सूचना देण्यात आल्या आहेत.
भारत निवडणूक आयोगाकडून सुमारे २४ वर्षांनंतर विधानसभा मतदारसंघांच्या मतदारयाद्यांचे विशेष सखोल पुनरिक्षण (SIR) हाती घेण्यात आले आहे. या प्रक्रियेत राज्य शासकीय, स्थानिक स्वराज्य संस्था, कंत्राटी कर्मचारी यांच्यासह शिक्षकांचीही मतदान केंद्रस्तरीय अधिकारी (BLO) म्हणून नियुक्ती करण्यात आली आहे. आयोगाने निश्चित केलेल्या कालमर्यादेत हे काम पूर्ण करण्यासाठी BLO ची भूमिका अत्यंत महत्त्वाची मानली जात आहे.
दरम्यान, पुणे जिल्हा परिषदेचे माध्यमिक शिक्षण अधिकारी भाऊसाहेब कारेकर यांनी याबाबत परिपत्रक प्रसिद्ध केले आहे.
