२० रुपये चोरीचा आरोप, शिक्षकांकडून अपमानास्पद वागणूक; ८वीच्या विद्यार्थिनीची आत्महत्या 

एज्युवार्ता न्यूज नेटवर्क 

बंगळुरूतील अनेकल तालुक्यातील मारसूर येथे इयत्ता आठवीत शिकणाऱ्या एका विद्यार्थिनीने गळफास लावून आत्महत्या (Female student's suicide) केल्याची धक्कादायक घटना घडली आहे. शाळेत २० रुपये चोरल्याचा खोटा आरोप (Accusation of stealing 20 rupees) आणि शिक्षकांकडून होणारी अपमानास्पद वागणूक (Humiliating treatment) सहन न झाल्याने तिने हे टोकाचे पाऊल उचलल्याचे तिच्या सुसाईड नोटमध्ये (Suicide note) नमूद आहे. सूर्यनगर पोलिस ठाण्यात याप्रकरणी गुन्हा दाखल करण्यात आला असून पोलिसांचा तपास सुरू आहे. 

मृत विद्यार्थिनीचे नाव मधुश्री असून ती मारसूर सरकारी उच्च प्राथमिक शाळेत शिकत होती. तिने लिहिलेल्या सुसाईड नोटमध्ये म्हटले आहे की, “शिक्षकांनी माझ्यावर २० रुपये चोरल्याचा खोटा आरोप केला. त्यांनी मला वारंवार ओरडले आणि अपमानित केले. मी हे सहन करू शकत नाही.” तिने आई, भावंडे आणि कुटुंबीयांची माफी मागितली असून, “आईला जबाबदार धरू नका, हा निर्णय मी स्वतः घेतला आहे,” असे स्पष्ट केले आहे. 

कुटुंबीयांनी सांगितले की, शाळेतील शिक्षकांच्या सततच्या जाचामुळे मुलीने हे पाऊल उचलले. आईने माध्यमांशी बोलताना म्हटले, “घरात तिला कोणताही त्रास नव्हता. शाळेत काही शिक्षक तिला त्रास देत होते.” घटनेच्या वेळी आई रुग्णालयात उपचार घेत होती त्याचवेळी नातेवाईकांनी सदरील घटनेची फोनवरून माहिती दिली. पोलिसांनी चिठ्ठीची सत्यता तपासली असून शिक्षक आणि कुटुंबियांच्या जबाबांची नोंद घेतली जात आहे. 

ही घटना शाळांतील विद्यार्थ्यांच्या मानसिक आरोग्याकडे दुर्लक्ष आणि शिक्षकांच्या वागणुकीबाबत गंभीर प्रश्न उपस्थित करते. शिक्षण विभागाने यासंदर्भात तातडीने चौकशी सुरू केली असून, शाळांमध्ये समुपदेशन आणि देखरेख वाढवण्याची मागणी जोर धरत आहे. पोलिस तपास पूर्ण झाल्यानंतर अधिकृत माहिती प्रसिद्ध केली जाईल.