एमपीएससी गट-ब परीक्षेची प्रश्नपत्रिका ४५ लाखांत, सोशल मिडियातील व्हायरल क्लिपमुळे खळबळ

एज्युवार्ता न्यूज नेटवर्क 

महाराष्ट्र लोकसेवा आयोगामार्फत (Maharashtra Public Service Commission) घेण्यात येणारी महाराष्ट्र गट-ब (अराजपत्रित) सेवा संयुक्त पूर्व परीक्षा (Group-B Preliminary Exam) तोंडावर आली आहे. मात्र, त्याच्या पूर्वसंध्येलाच सोशल मिडियावर व्हायरल होणाऱ्या क्लिपमुळे (Viral Audio clip on social Media) उमेदवारांमध्ये संभ्रम निर्माण झाला आहे. समाजमाध्यमांवर सध्या काही धक्कादायक ऑडिओ क्लिप व्हायरल होत आहेत. ज्यामध्ये ही परीक्षा देणाऱ्या अनेक उमेदवारांना काही अज्ञातांकडून फोन येत असून त्यांना ३५ ते ४५ लाख रुपयांमध्ये प्रश्नपत्रिका मिळतील असे सांगण्यात येत आहे. 

येत्या २ फेब्रुवारीला होणाऱ्या  MPSC गट-ब पूर्व परीक्षेच्या प्रश्नपत्रिका पुरवल्या जातील असे आमिष दाखवले जात आहे. स्पर्धा परीक्षा समन्वय समितीने यासंबंधित एक व्हिडीओ आपल्या X या सोशल मीडिया प्लॅटफॉर्मवर प्रसारित केला आहे. ह्या क्लिपची शहानिशा करून त्याची सत्यता तपासून महाराष्ट्र लोकसेवा आयोगाने कारवाई करण्याची मागणी स्पर्धा परीक्षा समन्वय समितीने केली आहे. 

तर इतरही काही माध्यमांनी अशाप्रकारच्या ऑडिओ क्लिप शेअर केल्या आहेत. अशाप्रकारच्या ऑडिओ क्लिप्समुळे परीक्षा तोंडावर असताना अशा प्रकारच्या घटना समोर आल्यामुळे महाराष्ट्र लोकसेवा आयोगाच्या विश्वासार्हतेवर प्रश्नचिन्ह उपस्थित होत आहेत. अशा व्हायरल होणाऱ्या क्लिपमुळे अभ्यास करणाऱ्या उमेदवारांच्या देखील मनस्थितीवर परिणाम होऊ शकतो. हे कॉलर फेक आहेत की खरे, त्यांच्याकडे उमेदवारांचे नंबर आले कोठून असे एक ना अनेक प्रश्न यामुळे उपस्थित झाले आहेत. मात्र अशाप्रकारच्या क्लिप वरती विश्वास न ठेवता अभ्यासात लक्ष देण्याचे आवाहन केले जात आहे.

महाराष्ट्र लोकसेवा आयोगातर्फे दिनांक २ फेब्रुवारी, २०२५ रोजी आयोजित करण्यात येणाऱ्या 'महाराष्ट्र गट-ब (अराजपत्रित) सेवा संयुक्त पूर्व परीक्षा - २०२४' या परीक्षेच्या सर्व प्रश्नपत्रिका अत्यंत कडेकोट बंदोबस्तात सुरक्षित असून अशा बातमीमध्ये कोणतेही तथ्य नाही. उमेदवारांनी अशा अफवांवर विश्वास ठेवू नये. उमेदवारांनी अशा प्रकरणांमुळे विचलित न होता अभ्यासावर लक्ष केंद्रित करावे. या प्रकरणी पोलीस आयुक्त, पुणे यांच्याकडून चौकशी करण्यात येत आहे, असे स्पष्टीकरण यासंदर्भात महाराष्ट्र लोकसेवा आयोगाकडून देण्यात आले आहे. 
_____________________________________________

सध्या सोशल मिडियावरील व्हायरल होत असलेल्या क्लिपकडे उमेदवारांनी दुर्लक्ष करावे. परीक्षा तोंडवर आली असल्यामुळे सर्वांनी अभ्यासात लक्ष द्यावे. तसेच महाराष्ट्र लोकसेवा आयोग आणि राज्य सरकारने सदर ऑडिओ, व्हिडीओतील सत्यता तपासून योग्य ती कारवाई करावी. उमेदवार व समाजामध्ये निर्माण होत असलेला संभ्रम दूर करावा. 

राहुल कवठेकर, अध्यक्ष स्पर्धा परीक्षा समन्वय समिती महाराष्ट्र राज्य