एलएलबी सीईटी परीक्षा 'पॅटर्न'मध्ये बदल, १५० ऐवजी आता 'एवढ्या' गुणांची परीक्षा

एज्युवार्ता न्यूज नेटवर्क 

राज्य सामाईक प्रवेश परीक्षा (State Common Entrance Examination) कक्षाकडून एलएलबी ३ वर्षे व ५ वर्षे अभ्यासक्रमासाठी (LLB 3 years and 5 years courses) घेण्यात येणाऱ्या CET प्रश्नपत्रिकेच्या स्वरूपात बदल (Change in question paper format) करण्यात आला आहे. सीईटी सेलकडून आता या दोन्ही अभ्यासक्रमांच्या प्रवेश परीक्षांसाठी प्रश्नपत्रिका १५० गुणांऐवजी १२० गुणांची काढली जाणार आहे. प्रत्येक प्रश्नाला १ गुण असणार आहे. नॅशनल लॉ विद्यापीठांसाठी घेण्यात येणाऱ्या प्रवेश परीक्षांच्या धर्तीवर आता सीईटी कक्षाने हा बदल केला आहे. मात्र परीक्षेच्या वेळेच्या मर्यादेत कोणताही बदल करण्यात आला नसून, या परीक्षेसाठी विद्यार्थ्यांना १२० मिनिटांचा वेळ दिला जाणार आहे.

तीन वर्षांच्या LLB अभ्यासक्रमासाठी विद्यार्थ्यांचा कल वेगाने वाढला आहे. आत्तापर्यंत या प्रवेश परीक्षेसाठी ७० हजारांपेक्षा अधिक विद्यार्थ्यांनी नोंदणी केली आहे. नोंदणीची अंतिम मुदत या पूर्वी २८ जानेवारीपर्यंत देण्यात आली होती. मात्र, विद्यार्थी आणि पालकांच्या मागणीनुसार त्यामध्ये मुदतवाढ देवून १३ फेब्रुवारीपर्यंत वाढवण्यात आली आहे. तर पाच वर्षांच्या एलएलबी अभ्यासक्रमासाठी आतापर्यंत सुमारे २० हजारांपेक्षा अधिक उमेदवारांनी नोंदणी केली आहे. 

या परीक्षेत चार पर्यायांसह वस्तुनिष्ठ बहुपर्यायी प्रश्न असतील. निगेटिव्ह मार्किंग नाही. उमेदवारांना चाचणीसाठी दोन तास दिले जातील. प्रश्न इंग्रजी आणि मराठीत असतील तर परीक्षेचा ऑनलाइन प्रकार असेल. प्रश्नपत्रिका एलएलबी-तीन वर्षांसाठी चार विभाग आणि एलएलबी-पाच वर्षांसाठी पाच विभागांवर आधारित असेल. 'कायदेशीर योग्यता आणि कायदेशीर तर्क, चालू घडामोडींचे सामान्य ज्ञान, तार्किक आणि विश्लेषणात्मक तर्क आणि इंग्रजी हे चार विभाग आहेत, तर मूलभूत गणित हे पाच वर्षांसाठी एलएलबीसाठी अतिरिक्त असणार आहे.