MPSC : आयडीबीआय बँक आणि राज्यसेवा पूर्व परीक्षा एकाच दिवशी, उमेदवार गोंधळात 

एज्युवार्ता न्यूज नेटवर्क 

महाराष्ट्र लोकसेवा आयोगातर्फे (Maharashtra Public Service Commission) महाराष्ट्र राजपत्रित नागरी सेवा संयुक्त पूर्वपरीक्षा २०२४ (Civil Services Joint Preliminary Exam 2024) आणि आयडीबीआय बँकेची परीक्षा (IDBI Bank Exam) एकाच दिवशी आयोजित करण्यात आल्याने हजारो परिक्षार्थी गोंधळाच्या परिस्थितीत आहेत. आयडीबीआय बँकेकडून कार्यकारी विक्री आणि ऑपरेशन्स या एक हजार पदांसाठी भरती प्रक्रिया राबवण्यात आली आहे. तर नागरी सेवा संयुक्त पूर्वपरीक्षा २०२४ परीक्षा १ डिसेंबर रोजी आयोजित करण्यात आली आहे. या दोन्ही परीक्षा एकाच दिवशी (Both exams are on the same day) आल्याने स्पर्धा परीक्षेची तयारी करणाऱ्या असंख्य विद्यार्थ्यांना बँकेची परीक्षा देता येणार नाही. 

राज्यसेवा पूर्वपरीक्षा आणि बँकिंग परीक्षा या दोन्ही स्पर्धा परीक्षांचे आयोजन एकाच दिवशी करण्यात आल्याने अनेक विद्यार्थ्यांना आव्हानात्मक परिस्थितीला सामोरे जावे लागत आहे. विशेषतः जे विद्यार्थी दोन्ही परीक्षा देण्याचा विचार करतात. त्यांच्यासाठी ही स्थिती अत्यंत कठीण ठरत आहे. कारण, या परीक्षा त्यांच्या करीयरसाठी महत्त्वाच्या असतात. या परीक्षांच्या यशावर त्यांच्या भविष्यातील संधी अवलंबून असते.अशा परिस्थितीत अनेक विद्यार्थ्यांना एकाच दिवशी दोन्ही परीक्षा देणे शक्य नसते. त्यामुळे त्यांना आपल्या प्राधान्यांनुसार परीक्षा निवडावी लागते. यासाठी सरकारने किंवा परीक्षा घेणाऱ्या संस्थांनी समन्वय साधून अशा प्रकारच्या स्थितीचे व्यवस्थापन करणे आवश्यक आहे. जेणेकरून विद्यार्थ्यांना एकाच दिवशी एकापेक्षा अधिक महत्त्वाच्या परीक्षा देण्याची गरज पडणार नाही,अशी अपेक्षा व्यक्त केली जात आहे. 
____________________________

एकाच दिवशी दोन्ही परीक्षा आल्यामुळे बँक पद भरतीसाठी नोंदणी केलेल्या अनेक विद्यार्थ्यांना परीक्षेपासून मुकावे लागणार आहे. यावर्षी विविध कारणांमुळे राज्यसेवा पूर्वपरीक्षा अनेक वेळा पुढे ढकलण्यात आली आहे. त्यामुळे विद्यार्थ्यांनी दोन्हीपैकी एक परीक्षा देणे अपेक्षित आहे. पुढील काळात अशी परिस्थिती निर्माण होऊ नये म्हणून परीक्षा घेणाऱ्या संस्था आणि सरकार यांच्या समन्वयातून मार्ग काढणे आवश्यक आहे.  

महेश बडे (विद्यार्थी प्रतिनिधी, स्टुडंट राइट्स असोसिएशन)