अकरावी प्रवेशाची अंतिम विशेष फेरी आजपासून; प्रवेश न झालेल्या विद्यार्थ्यांना शेवटची संधी

एज्युवार्ता न्यूज नेटवर्क 

राज्यातील आकरावी प्रवेश प्रक्रिया (Class 11 Admission Process) शैक्षणिक वर्ष २०२६-२७ (Academic year 2026-27) साठी केंद्रीय ऑनलाईन पद्धतीने (Centralized online system) सुरू आहे. या प्रक्रियेत अद्याप प्रवेश निश्चित न झालेल्या विद्यार्थ्यांसाठी (Students whose admission has not been confirmed) अंतिम विशेष फेरी जाहीर करण्यात आली आहे. नियमित तीन फेऱ्या आणि त्यानंतरच्या विशेष पाच फेऱ्या पूर्ण झाल्यानंतर आता ही शेवटची संधी विद्यार्थ्यांना मिळणार आहे. अंतिम विशेष फेरीची प्रक्रिया आज १२ ऑगस्टपासून सुरू होणार असल्याची माहिती माध्यमिक शिक्षण संचालक डॉ. महेश पालकर (Dr. Mahesh Palkar) यांनी दिली आहे.

अंतिम विशेष फेरीचे वेळापत्रक निश्चित करण्यात आले आहे. नोंदणी, अर्ज भरणे, दुरुस्ती आणि पसंतीक्रम निवडणे ही प्रक्रिया १२ ऑगस्ट सकाळी १० वाजता सुरू होऊन १६ ऑगस्ट सायंकाळी ६ वाजेपर्यंत चालेल. अलॉटमेंट प्रक्रिया १७ ऑगस्ट रोजी होईल. वाटप यादी १८ ऑगस्ट सकाळी १० वाजता प्रसिद्ध होईल. त्यानंतर प्रवेश निश्चितीची प्रक्रिया १८ ऑगस्ट सकाळी ११ वाजता सुरू होऊन २० ऑगस्ट सायंकाळी ६ वाजेपर्यंत चालेल.

शिक्षण संचालनालयाने विद्यार्थ्यांना आवाहन केले आहे की, वेळेत अर्ज भरावा आणि आवश्यक कागदपत्रे तयार ठेवावीत. या शेवटच्या संधीचा योग्य वापर करून प्रवेश प्रक्रिया यशस्वीपणे पूर्ण करावी. अधिक माहितीसाठी अधिकृत संकेतस्थळावर भेट द्यावी किंवा संबंधित शिक्षण अधिकाऱ्यांशी संपर्क साधावा, असे संचालनालयाने सांगितले आहे.