यंग इनोव्हेटर सायन्स एक्झिबिशन २०२६ मध्ये म. ए. सो. रेणावीकर माध्यमिक विद्यालयाचा प्रथम क्रमांक

एज्युवार्ता न्यूज नेटवर्क 

रोटरी क्लब आणि जे. जे. सायन्स अकॅडमी यांच्या संयुक्त विद्यमाने आयोजित 'यंग इनोव्हेटर सायन्स एक्झिबिशन-२०२६' स्पर्धेत म. ए. सो. रेणावीकर माध्यमिक विद्यालयाने प्रथम क्रमांक पटकावत उल्लेखनीय यश संपादन केले.

विद्यालयातील गौतम त्र्यंबके आणि आकाश गागरे या विद्यार्थ्यांनी आपल्या अभिनव विज्ञान प्रकल्पाच्या प्रभावी सादरीकरणाच्या जोरावर प्रथम क्रमांक मिळविला. या यशाबद्दल त्यांना ३० हजार रुपये रोख पारितोषिक, प्रथम क्रमांकाची ट्रॉफी आणि प्रमाणपत्र प्रदान करण्यात आले.

या यशासाठी विद्यार्थ्यांना संगणक शिक्षिका सौ. दिप्ती जैन यांचे मार्गदर्शन लाभले. उत्कृष्ट मार्गदर्शनाबद्दल त्यांनाही ट्रॉफी व प्रमाणपत्र देऊन गौरविण्यात आले. तसेच स्पर्धेत सहभागी सर्व विद्यार्थ्यांना सहभाग प्रमाणपत्र प्रदान करण्यात आले.

या विज्ञान स्पर्धेत नगर जिल्ह्यातील ७० शाळांमधील १९० विज्ञान प्रकल्प आणि ४५० विद्यार्थ्यांनी सहभाग घेतला होता. म. ए. सो. रेणावीकर माध्यमिक विद्यालयातून ४ प्रकल्प आणि ९ विद्यार्थ्यांनी स्पर्धेत सहभाग नोंदविला. विद्यालयातील सर्व प्रकल्पांचे सादरीकरण दर्जेदार झाल्याने परीक्षकांनी विद्यार्थ्यांच्या संशोधनवृत्ती, सादरीकरण कौशल्य आणि नावीन्यपूर्ण कल्पनांचे विशेष कौतुक केले.

या उल्लेखनीय यशाबद्दल प्रथम क्रमांक पटकावणाऱ्या विद्यार्थ्यांसह स्पर्धेत सहभागी सर्व विद्यार्थी, मार्गदर्शक शिक्षिका, पालक तसेच विद्यालयाच्या सर्व शिक्षकांचे सर्व स्तरांतून अभिनंदन करण्यात येत आहे.