नीट-पीजी २०२६: चुकीच्या परीक्षा केंद्र शहरांचे एसएमएस; एनबीईएमएसने तांत्रिक कारण सांगितले

एज्युवार्ता न्यूज नेटवर्क 

नीट परीक्षांभोवतीचा गोंधळ अद्याप संपलेला दिसत नाही. नीट-पीजी २०२६ (NEET-PG 2026) च्या काही उमेदवारांना परीक्षा केंद्रांच्या चुकीच्या शहरांची (Exam Center City) माहिती एसएमएसद्वारे मिळाल्याच्या तक्रारी समोर आल्या आहेत. यानंतर नॅशनल बोर्ड ऑफ एक्झामिनेशन्स इन मेडिकल सायन्सेसने (NBEMS) स्पष्टीकरण दिले आहे. बोर्डाने म्हटले की, तांत्रिक कारणांमुळे (Technical reasons) काही उमेदवारांना अनवधानाने चुकीच्या परीक्षा केंद्र शहराची माहिती एसएमएसद्वारे (Incorrect SMS information)पाठवली गेली. त्यानंतर योग्य शहर दर्शवणारे एसएमएस आणि ई-मेल पाठवण्यात आले आहेत. पीटीआयने हे वृत्त दिले आहे.

पदव्युत्तर वैद्यकीय अभ्यासक्रमांसाठी होणारी नीट-पीजी २०२६ परीक्षा ३० ऑगस्ट रोजी होणार आहे. बोर्डाने उमेदवारांना पाठवलेल्या पत्रात म्हटले आहे की, नीट-पीजी २०२६ अर्जदारांना परीक्षा केंद्रांच्या शहराचे वाटप नियोजित वेळापत्रकानुसार एनबीईएमएसच्या संकेतस्थळाद्वारे कळवण्यात आले आहे. काही तांत्रिक गडबडीमुळे काही उमेदवारांना एसएमएसद्वारे कळवण्यात आलेले शहर चुकीचे होते. त्यानंतर योग्य वाटप केलेले शहर दर्शवणारे एसएमएस आणि ई-मेल पाठवण्यात आले आहेत, असे बोर्डाने स्पष्ट केले.

योग्य परीक्षा केंद्रांच्या ठिकाणांचा तपशील एनबीईएमएसच्या संकेतस्थळावरील सर्व उमेदवारांच्या अर्जदार पोर्टलवर उपलब्ध आहे, असे बोर्डाने सांगितले. उमेदवारांनी त्यांना वाटप करण्यात आलेल्या परीक्षा केंद्र शहराबाबत अचूक माहिती मिळवण्यासाठी अधिकृत संकेतस्थळाचा आधार घ्यावा, असा सल्ला देण्यात आला आहे. पूर्वी मिळालेल्या एसएमएसवर अवलंबून न राहता पोर्टलवर जाऊन माहिती तपासावी, असे आवाहन करण्यात आले आहे.

बोर्डाने उमेदवारांना सावधगिरीचा इशाराही दिला आहे. नेहमी एनबीईएमएसकडून येणाऱ्या अधिकृत माहितीवरच विश्वास ठेवा आणि बनावट संकेतस्थळे तसेच चुकीच्या माहितीपासून सावध राहा, असे बोर्डाने म्हटले आहे. उमेदवारांनी अधिकृत पोर्टलवर नियमितपणे लॉगिन करून आपले परीक्षा केंद्र शहर तपासणे आवश्यक आहे.

या तांत्रिक गडबडीमुळे उमेदवारांमध्ये संभ्रम निर्माण झाला होता. मात्र बोर्डाने त्वरित योग्य माहिती पाठवून स्थिती स्पष्ट केली आहे. नीट-पीजी २०२६ ची तयारी करणाऱ्या सर्व उमेदवारांनी अधिकृत स्रोतांवरच भर द्यावा आणि वेळेवर परीक्षा केंद्रांची पुष्टी करावी, जेणेकरून परीक्षेच्या दिवशी कोणतीही अडचण येणार नाही.

___________________________________

NEET-PG परीक्षेत देखील परीक्षा केंद्रावरून मोठ्या प्रमाणात गोंधळ उडालेला आहे. आता एका विद्यार्थ्याला मेसेज आणि मेल मध्ये हैदराबाद सेंटर असल्याचे सांगितले आहे तर पोर्टलवर मात्र पुणे दाखवत आहे. विद्यार्थ्यांनी कुठले परीक्षा केंद्र गृहीत धरायचे ? एवढा भोंगळ कारभार ! 

रोहित पवार, आमदार