TET पेपर फुटी प्रकरणी सोलापूर कनेक्शन; प्रकाश पवारला अटक
प्रकाश पवारला भिवंडी न्यायालयात हजर करण्यात आले. न्यायालयाने त्याला 15 ऑगस्टपर्यंत पोलीस कोठडी सुनावली आहे. पवारला अटक केल्यामुळे पेपर फुटीत महाराष्ट्रातील कोण कोण सहभागी आहेत, याचा तपास पोलिसांकडून केला जाणार आहे.
Eduvarta
एज्युवार्ता न्यूज नेटवर्क
टीईटी पेपर फुटी प्रकरणी मोठी घडामोड समोर आले असून पेपर फुटीत महाराष्ट्र कनेक्शन उघड झाले आहे. त्यात सोलापूर जिल्ह्यातील 'धृवअकॅडमी'च्या प्रकाश पवार याला अटक करण्यात आली आहे. पेपर फुटी प्रकरणी उत्तर प्रदेश, बिहार ,हरियाणा येथून 15 जणांना अटक करण्यात आली आहे. मात्र, हा पेपर नेमका कोणाला विकला जाणार होता? याचा अजूनही तपास सुरू आहे.
महाराष्ट्र सह देशभर गाजलेल्या टीईटी पेपर फुटीमध्ये सोलापूर कनेक्शन समोर आल्याने सर्वांनाच आश्चर्य वाटत आहे. टीईटी परीक्षेचा पेपर भिवंडी येथे विकण्यासाठी आलेल्या आरोपींना पोलिसांनी ताब्यात घेतले होते. त्यानंतर उत्तर प्रदेश, बिहार, हरियाणा येथून अटक सत्र सुरू झाले. त्यानंतर आता टीईटी पेपर फुटी मधील मुख्य सूत्रधार ब्रिजेश गुप्ता याच्या चौकशीत पोलिसांना प्रकाश पवार यांचे नाव आढळून आले. पोलिसांनी केलेल्या तपासात पवारने यापूर्वी अटक केलेल्या आरोपींना काही विद्यार्थ्यांची कागदपत्र दिल्याचे निष्पन्न झाले.
प्रकाश पवारला भिवंडी न्यायालयात हजर करण्यात आले. न्यायालयाने त्याला 15 ऑगस्टपर्यंत पोलीस कोठडी सुनावली आहे. पवारला अटक केल्यामुळे पेपर फुटीत महाराष्ट्रातील कोण कोण सहभागी आहेत, याचा तपास पोलिसांकडून केला जाणार आहे.
प्रकाश पवार हा सोलापूर येथे धृव अकॅडमी चालवतो या अकॅडमीच्या माध्यमातून पोलीस पूर्व भरती प्रशिक्षणाचे मार्गदर्शन करतो. मात्र, याच प्रकाश पवारकडे 20 विद्यार्थ्यांचे पेपर आढळून आल्याची माहिती आहे. त्यातील पाच पेपर टीईटी उत्तीर्ण झालेल्या विद्यार्थ्यांचे असल्याचा संशय आहे. याबाबतचा तपास पोलिसांकडून केला जात आहे.
